Procesu d’estabilización chapuceru ya irregular

El pasáu vienres, 29 de xunu, publicóse nel BOE el Real Decreto-ley 5/2023, de 28 de xunu, onde nell so artículu 217 autoriza una tasa adicional a les Alministraciones Públiques pa que convoquen procesos selectivos conforme a la disposición adicional octava de la Llei 20/2021, de 28 d’avientu, de midíes p’amenorgar la temporalidá nel empléu públicu. 

Resulta que -asina queda recoyío nel preámbulu- el Gobiernu reconoz que na execución de los procesos de estabilización produciéronse diferencies respecto del sistema selectivu previstu pola disposición adicional octava de la citada llei, cola consecuencia de qu’en función del territoriu los procesos d’estabilización pa supuestos asemeyaos *pudieren convocase con riegles distintes. 

Cuando’l mesmu Gobiernu y les organizaciones sindicales firmantes apauten un alcuerdu d’estabilidá que tien d’incluyir, por muncho que nun-yos preste, un concursu de méritos y s’enfoten en torpedialu, cada cual dende la so comunidá, pasen estes coses. N’Asturies nun hubo un analís rigorosu de les plantiyes docentes, como nos consta qu’hubo en Cantabria tres 10 meses sectoriales de negociación. Equí, la ufierta d’empléu públicu pal personal docente non universitario resolvióse in extremis -como pal restu- ente’l 4 y el 19 de mayu de 2022, con trés xuntes de grupos de trabayu pel mediu nes que l’Alministración y los sindicatos de la Mesa Xeneral de negociación del Principáu d’Asturies alcordaron contabilizar “vacantes estructurales” de forma arbitraria pa que’l númberu de places a ufiertar pol sistema de concursu-oposición o concursu de méritos s’afayare a les cifres qu’estos postreros, soxetivamente y acordies colos sos intereses discursivo-populistes, meyor s’afixeren al so discursu, contrariu dende siempres a la estabilización del personal por concursu de méritos. D’ende’l resultáu de les cifres de la convocatoria de places n’Asturies apavoriantemente favorable al concursu-oposición frente al concursu de méritos y *lo reseñao pol Real Decretu-llei 5/2023, de 28 de xunu, de que “pudieren    convocase por riegles distinta” nes diferentes alministraciones territoriales.

El casu ye que, a la vista de la ruina ufierta de places por aciu concursu de méritos -234 places pa tolos cuerpos- SUATEA interpunxo contenciosu-alministrativu énte’l TSJ d’Asturies contra l’Alcuerdu de 27 de mayu de 2022, del Conseyu de Gobiernu, pol qu’aprueba la Ufierta d’Empléu Públicu estraordinaria pa la estabilización del empléu temporal n’aplicación de la Llei 20/2021. Esa impugnación acotóse al Anexu III referíu a les places de personal funcionario docente non universitario al considerar que s’escluyeren un eleváu númberu de places que cumplíen los requisitos de la disposición adicional 8ª de de la Llei, alegando que, dientro d’esa norma teníen de ser incluyíes toles places que, a la entrada a vigor de la mesma, tuvieren siendo ocupaes por personal interino con una relación de temporalidá anterior al 1-1-2016. Conforme a la prueba pericial apurrida esistíen, siquier, 998 places d’esta triba. Sicasí, el Tribunal Cimeru de Xusticia d’Asturies, un mes antes de la publicación d’esti Real Decretu Llei, de 28 de xunu, desestimó la nuesa demanda porque la clave del asuntu yera’l conceutu de vacante estructural” y lo qu’apurría la nuesa prueba yeren vacantes, pero d’otra naturaleza (non  estructural). Esto ye, 998 persones tuvieren ocupando places conseñaes con una “V” nes ufiertes d’entamu de cada cursu escolar dende’l 2015-16 hasta’l 2021-22, pero nun teníen la naturaleza estructural qu’alcordaren definir. 

El casu ye que, dende l’añu 2015, el númberu de puestos vacantes na plantiya orgánica de los centros nun baxa de los 2.000, algamando picos de 2.687 en 2019 y de 2.619 en 2022. Too ello, magar de les convocatories de procedimientos selectivos convocaos dende entós. Por resumir, cada cursu, con anterioridá al 1 de xineru de 2016, más de 2000 persones cubren de forma temporal los puestos que tán vacantes na plantiya orgánica (estructurales, ensin dala dulda), pero, por arte de birlibirloque, axústense 234 pal concursu méritos. 

Asemeyáu despropósitu, tomadura de pelo, o aparente prevaricación rescampla nes declaraciones de dalgún representante sindical cuando, tres la publicación de los llistaos provisionales de persones escoyíes por aciu concursu de méritos, atreverse a declarar: “ Cantabria convocó el triple de plazas por concurso de méritos que Asturias y casi el doble que Castilla y León generando un efecto llamada que llevará al paro a cientos de docentes cántabros. […] Menos mal que la Consejería hizo caso a CCOO y UGT y no a quienes de manera temeraria exigían que todas las plazas saliesen a concurso.” 

L’efectu llamada produzse cuando t’obliguen a escoyer una comunidá a la que dir presencialmente al exame porque toes elles convoquen al empar, non cuando puedes presentar los tos méritos per rexistru en toes elles al empar y lo único que tienes que pensar ye la prelación o preferencia xeográfica. D’ufiertase más places n’Asturies, les  más de 170 persones asturianes que llograron plaza n’otra comunidá podríen estabilizase equí. Por nun falar de les más de 40 que se vieron obligaes a solicitar un puestu fuera porque la so especialidá, directamente, nun s’ufiertó.

Y agora que’l concursu de méritos yá ta (mal)fechu, llega l’Artículu 217 a garantizar en tol territoriu’l derechu d’accesu a los procesos d’estabilización en condiciones d’igualdá. ¿Quier esto dicir que la igualdá – méritu y capacidá- nun foi unu de los principios rectores de les convocatories escepcionales y per una sola vegada de cada territoriu? 

Por si nun fuera abondo, entá hai más: “el número de plazas de la tasa adicional será el equivalente a aquellas de naturaleza estructural, ocupadas de forma temporal a 30 de diciembre de 2021, por personal con una relación de esa naturaleza anterior al 1 de enero de 2016, que no hubiera superado el proceso de estabilización convocado con un sistema selectivo distinto al previsto en la disposición adicional octava de la Ley 20/2021, de 28 de diciembre.

Las ofertas de empleo público deberán estar aprobadas antes del 31 de diciembre de 2023, y las convocatorias resueltas antes del 31 de diciembre de 2024, ajustándose a los principios de igualdad, mérito, capacidad y libre concurrencia.”

Solo podemos calificar esta midida como remiendu tardíu y chambón. Tal que defendimos dende un principiu, los procesos d’estabilización tendríen de tar acutaos a los/les trabayadores en situación d’abusu de temporalidá en base a la so antigüedá. Una vegada más, too son incógnites, opacidá y urxencies. 

Por too ello, dende SUATEA esiximos:

1. Una definición de vacante estructural n’educación igual pa tou los territorios del Estáu qu’unifique’l cómputu.
2. Un analís rigorosu de les plantiyes y xuna negociación tresparente de la tasa adicional de estabilización.
3. Una esplicación de cómo van calcular, primero que se celebren les oposiciones d’estabilización nel Cuerpu de Maestros, el númberu de places de les persones que nun lu superaron. 
4. Un plan pa compensar los tresllaos “forzosos” de les persones que llograron plaza n’otra comunidá si resulta que, agora, nesta segunda ufierta -enantes imposible, según la mesma Llei 20/2021-, ufiértense nueves places na d’elles.

Secretariáu d’Asturies de SUATEA

Audio para prensa (ESCUCHAR)