Home > Comunicaos > La xusticia europea confirma l’abusu na contratación del personal interino

La xusticia europea confirma l’abusu na contratación del personal interino

LA SENTENCIA DEL TRIBUNAL DE XUSTICIA DE LA UNIÓN EUROPEA CONFIRMA L’ABUSU NA CONTRATACIÓN DEL PERSONAL INTERINO

Les Alministraciones educatives y el Ministeriu d’Educación tienen de resolver la situación de les persones afectaes n’Educación primero que sían los tribunales españoles los que decidan les compensaciones qu’establez la sentencia.

Como taba previsto, güei 19 de marzu, el Tribunal de Xusticia de la Unión Europea dio a conocer la sentencia al respective d’ún de los munchos casos qu’allegaron a la Xusticia europea a la gueta de soluciones frente l’abusu y fraude na contratación qu’entamen les Alministraciones Públiques de tol Estáu. La sentencia dictada güei refierse a dos persones contrataes pol Serviciu Madrilanu de Salú y, en dambos casos, pretendíen la conversión automática en trabayadores fixos como sanción al abusu na relación temporal socesiva.

Esa sentencia conclúi qu’hubo abusu na contratación del personal interino que tien enriestrao contratos a lo llargo más de trés años, yá que ,“sobro la base d’una relación de serviciu de duración determinada”, estes persones desempeñaron “ de forma constante y siguida les mesmes funciones, cuando’l caltenimientu de manera permanente d’esi emplegáu públicu nesa plaza vacante débese al incumplimientu per parte del empleador de la so obligación llegal d’entamar nel plazu previstu un procesu selectivu en visu a aprovir definitivamente la mentada plaza vacante”.

Y ye que, tal como dende SUATEA y los Stes-i venimos denunciando, les Alministraciones Públiques emplegaron la fórmula de contratar a personal interino, non pa resolver cuestiones temporales, puntuales y urxentes, como dexa la normativa, sinón pa cubrir puestos y vacantes permanentes y estructurales. Estes práctiques fraudulentes executáronse saltando plazos y Ufiertes Públiques d’Empléu abondes que se deberíen convocase nun plazu máximu de trés años tres la contratación del personal interino. En cuenta de cumplir la llei, el sector públicu caltuvo a esti personal interino nos sos puestos mientres años y, en munchos casos, décades.

Per otru llau, consideramos sollinable que la sentencia da unu barganazu a los procesos d’ estabilización y a los procesos selectivos como mecanismu pa cesar al personal interino oxetu d’un abusu porque, afirma, estos procesos nun cumplieron los requisitos y los plazos al nun incluyir toles places vacantes nes OPEs del añu de nomamientu. Ye más, la sentencia afirma qu’estos procesos namá seríen compatibles cola Directiva europea si participara namá’l personal oxetu del abusu, esto ye, OTORGA VIABILIDÁ LLEGAL AL ACCESU ESTREMÁU que dende va décades defendemos dende SUATEA y los STES-i. Nesti aspeutu, recordamos que SUATEA y los STEs-i opunxímonos a los procesos d’estabilización recoyíos nel mal llamáu “Alcuerdu pa la meyora del empléu públicu” suscritu en 2017 poles centrales sindicales de la Mesa Xeneral de la Función Pública, un Alcuerdu tovía vixente que pretende sacar a Ufierta d’Empléu Públicu toles places ocupaes por personal interino mientres más de trés años. L’Alcuerdu non solo nun solucionó’l problema del altu porcentaxe d’interinidaes de los nuesos centros educativos (dempués de los dos primeres convocatories, siguimos percima del 20% de profesoráu interín sobro’l total de docentes), sinón qu’agravó la situación d’estes persones, pues pretendió estabilizar les places, pero non a les persones que les ocupen, lo que provocó nestos últimos años que miles de persones perdieren el so puestu de trabayu tres los procesos selectivos.

D’últimes, la sentencia, anque nun impón qué tipu de sanción tien d’imponese, supón una importante meyora na reconocencia de los derechos del personal interino y, ensin dulda, ye un barganazu pa les Alministraciones Públiques porque asegura que nun pueden amparase na normativa actual pa negar la esistencia del abusu cuando esti personal nun ocupa places provisionales nin escepcionales, sinón estructurales. Per otra parte, dexa abierta la vía pa siguir reclamando énte los tribunales y les distintes Alministraciones los derechos llaborales de miles de persones nesta situación. Determina que correspuende a los tribunales españoles decidir la sanción a les Alministraciones Públiques y la compensación al personal oxetu d’abusu na contratación, ente los que cabo la conversión en fixos o la indemnización efectiva y disuasoria pa compensar l’abusu na contratación.

Dende SUATEA y los STEs-i, encamentamos a les distintes Alministraciones educatives y al Ministeriu d’Educación a qu’asuman lo que la Xusticia europea dictaminó, encarando una solución integral que ponga fin a una inxusticia que s’enllargó mientres décades. Ye obligación del Ministeriu d’Educación empecipiar el procesu pa establecer legalmente la normativa que reconsidere la situación del profesoráu interín y déase-yos por fin la estabilidá definitiva nel empléu que-yos pertenez en xusticia.

Pel momentu, mañana, 20 marzu, va celebrase una Mesa sectorial col Ministeriu y va tratase el sistema d’accesu. Los STES-i vamos plantegar qu’esta sentencia obliga a toma decisiones inmediates y que nun vamos permitir más despidos. Per otra parte, n’Asturies, tres esta sentencia tenemos más argumentos pa reclamar la estabilidá definitiva del profesoráu interíno.

De too ello siguiremos informándovos conforme surdan novedaes.

Uviéu, 19 de marzu de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344