Primeres impresiones d’entamu de cursu: suaves maneres y datos ambiguos

Esta entrada está disponible en: Castellano (Castellanu)

SUATEA nun comparte l’optimismu amosáu’l martes, 5 de setiembre, na xunta coles organizaciones sindicales pola Conseyera d’Educación, Lydia Espina, al respective de rebaxar  la tasa d’interinidá. Mientres que la Conseyera s’allegraba d’amenorgar la tasa d’interinidá al 8,7% de la plantiya tres el procesu de estabilización d’esti branu, datu bien cercanu al oxetivu del 8%, la realidá diznos que, a día 1 de setiembre, alredor d’una cuarta parte de la plantiya ta formada por profesoráu interino, del que más del 40% ta contratáu a media xornada, llegando inclusive a casos como’l de la especialidá d’Audición y Llinguaxe, que supera’l 60%, o’l de asturianu, qu’algama’l 80%. 

La diferencia ente un datu y otru ye que mientres nós falamos del porcentaxe de interinaxe sol profesoráu total contratáu, la Conseyería remana puramente’l personal contratáu como interino que ta ocupando puestos de plantiya orgánica (en fraude de llei). Poro, el datu estrella del que presume Lydia Espina ye una interpretación comenenciuda pa tapecer la entá elevadísima tasa d’interinidá n’Asturies.

Repitimos, coles mesmes, la necesidá de tresparencia na naturaleza de los puestos docentes (estructurales/orgániques frente a temporales/necesidaes autorizaes) pa conocer la realidá de la plantiya, asina como favorecer un mayor papel a la negociación coles organizaciones sindicales, pidimientos que venimos faciendo de cursos anteriores.

Nun queremos acabar ensin mentar que compartimos la prioridá de la Conseyería pol bienestar emocional  y la prevención del acosu, pero lo qu’ensin dulda contribuyiría a ello sería l’atención  personalizada al alumnáu y una apuesta rotunda pol plan de coeducación. Más eficaz qu’una pionera unidá de respuesta rápida pa xestionar conflictos nos centros, sería una plantiya amplia y estable, con más tiempu pa l’acción tutorial, pa la formación, y pa la coordinación docente y implementación de los planes y programes del centru. 

Sicasí, la realidá ye que la burocracia sigue afogando’l llabor docente;  la ratio de bona parte del profesoráu supera en demasía los 50 alumnos y alumnes imposibilitando l’atención individualizada; na mayoría de les unidaes d’orientación, el personal parte la so xornada llaboral en dellos centros y el presupuestu de programes como’l VUELA distribúi en xornaes parciales de naturaleza temporal. El Decretu d’Equidá inda nun vio la lluz debío al eleváu númberu d’enmiendes que recibió’l testu propuestu nel so momentu. El plan de coeducación, magar ser obligatoriu, nun tien  el protagonismu que se merez, nun hai un oxetivu institucional p’algamar el 80% de participación nos cursos de formación del profesoráu, como sí asocede col plan de dixitalización y, en concencia nun cunta col  millonariu presupuestu d’esti postreru, que va amenorgar la fienda dixital, non la de xéneru, y, de camín, va xenerar una bona cartera de veceros a les multinacionales.

El Secretariaú del SUATEA,
N’Uviéu, a 11 de setiembre de 2023

Print Friendly, PDF & Email

Esta entrada está disponible en: Castellano (Castellanu)