La Conseyería castiga a les families de La Colonia Ceano

Va unes selmanes les families del aulariu d’infantil de La Colonia Ceano saltaben a los medios de comunicación pa protestar pol anunciu de zarru d’esi centru. Frutu d’estes protestes consiguieron caltener l’aulariu abiertu a lo llargo d’esti cursu quedando cerrada la posibilidá de matricular a alumnáu nuevo nel cursu de tres años.

Como respuesta a estes protestes, la selmana pasada les families afectaes enteráronse de que’l  Director Xeneral de Personal Docente y Planificación Educativa fixera llegar al centru un resolvimientu onde s’indica qu’en Colonia de Ceano va caltenese una unidá mista de cuatro y cinco años con 23 alumnos y alumnes. Esto va en contra de los alcuerdos de plantiyes de primaria qu’indica que les unidaes mistes d’infantil tienen que tener a lo más una ratio de 16.

Dende SUATEA asistimos plasmaos a la forma d’actuar de la Conseyería d’Educación: como si d’un asuntu personal se tratare, quien tien la potestá pa la distribución d’unidaes decide tomar represalies y castigar al alumnáu de Colonia de Ceano y les  sos families incumpliendo tolos alcuerdos esistentes y amontonando a los neños y neñes d’esti centru aumentando nada menos qu’en  7 persones la ratio establecida. Grupos que perpasen  la ratio llegal hailos tamién nos colexos de Mieres: Aniceto Sela, con un grupu d’EI de 5 años con 26 persones y Santiago Apóstol con un grupu d’Asturianu de 3º de Primaria con 27 persones dende primeros de cursu (ratio máxima legal 25).

Dende SUATEA ponemos estos exemplos pa denunciar el tratu que dende la Conseyería ta dándose a tola comunidá educativa, conculcando infinidá de derechos de toles persones que d’ella formamos parte.  Esiximos que dende la Conseyería se trate de forma digna a la comunidá educativa y que s’amuese respetu d’una vegada por toes a una Escuela Pública a la que dellos  egos tantu dañu tán faciendo.

Secretariáu d’Asturies de SUATEA

                                   UVIÉU 19/02/16