Les 18/23 hores nel Conseyu Escolar del Estáu

Nel Plenu del Conseyu Escolar del Estáu celebráu en Madrid güei, día 2 d’ochobre, participó Emma Rodríguez, representante de SUATEA y qu’anguaño ye conseyera d’esti órganu en representación de STEs-I.

La ministra d’educación anunció hai tiempo, a los medios, como una de les so primeres y más importantes midíes, la reversión de los retayos que venía sufriendo’l sistema educativu dende la etapa del gobiernu anterior. En concreto, anuncióse la derogación inmediata del Real Decretu Llei 14/2012 y la posibilidá de que les Alministraciones con competencies educatives pudieren antemanar les consecuencies d’esti cambéu a lo llargo del cursu actual.

Agora, col testu del Anteproyectu de Llei que se presentó al Conseyu Escolar, la decisión de Gobiernu ye aplazar (sacante lo referío a les sustituciones) la reversión de los retayos educativos al cursu 2019/2020. La consecuencia d’esto ye que, dende una perspectiva xurídica, aquellos territorios que priorizaron recuperar la calidá educativa y dende el 1 de setiembre amenorgaron les ratios y l’horariu llectivu del profesoráu, atópense ensin sustentu llegal pa caltener estes midíes.

Dende la Confederación STEs-Intersindical nun mos queda otra qu’esixir que se retome la intención inicial, calteniendo la redacción orixinal nel borrador d’anteproyectu de llei  pa que dexe antemanar a lo llargo d’esti cursu 2018/2019 la reversión de los retayos, dando asina la garantía necesaria pa que les Alministraciones con competencies educatives puean  caltener lo que yá empezaron a aplicar o dexar que se vaigan poniendo en marcha les midíes mentaes a lo llargo del presente cursu, frenando, como se diz na esposición de motivos del anteproyectu de llei, la continuación del detrimentu nel nivel calidá de la enseñanza y nel desempeñu de la docencia.

Queremos, tamién, manifestar la necesidá de que s’eviten nel futuru desigualdaes grandes ente los distintos territorios a la hora de regular la xornada llectiva del profesoráu, polo que opinamos que ye necesario que nesti anteproyectu de llei se regule la xornada máxima, qu’en nengún casu tien pasar de les 23 hores n’Infantil y Primaria y a 18 h. nel restu d’enseñances. Respetando siempres les competencies de cada Alministración educativa.

N’ Asturies, teniendo en cuenta’l fracasu de la negociación sobre xornada llaboral del profesoráu del pasáu 20 de setiembre y l’incertidume ya insatisfaición qu’ello xeneró ente’l profesoráu, dende SUATEA apuramos a la Conseyería a que reabra de forma inmediata la negociación sobre xornada llaboral del profesoráu y sobre les condiciones llaborales.

Uviéu, 2 d’ochobre de 2018