La Conseyera d’Educación nun recorta, “PLANIFICA”

… pero nun diz que l’oxetivu de la so planificación ye’l recorte

La Conseyera de Educación, Ana González, nun dexa de sorprender a la comunidad educativa asturiana con recorte sobre recorte, anque esta palabra a ella nun-y presta y prefier llamalo “planificación”. Tenemos que desplicá-y a la Sra. Conseyera que planificar significa facer un plan metódicamente organizáu p’algamar un oxetivu determináu. Ta claro que la Sra. Conseyera efectivamente planifica y que l’oxetivu de la so planificación ye recortar llevando a mínimos los recursos disponibles tanto humanos como materiales nos centros públicos asturianos.

Na so planificación que tien como únicu oxetivu’l recorte, vimos cómo recorta decenes d’unidaes nos centros públicos como pasa en dellos centros de Xixón y Les Cuenques, cómo aprovechando les xubilaciones que se producen desapaecen de les plantiyes autorizaes cientos de places, cómo se contrata a cientos d’interinos a media xornada col envís de falsiar los númberos de contrataciones y un llargu etc.

Añedío a tolo anterior, nestos díis, pudimos ver cómo na adxudicación provisional del concursu de tresllaos cientos de places nun s’adxudiquen en resultes. Esto significa que si un profesor solicita y saca una plaza n’otru centru,  la plaza que él dexa tien d’adxudicase a otru docente que la solicitara. Poles denuncies que mos tán llegando, munchos docentes tán viendo cómo la plaza que solicitaron y de la que se desplaza’l titular nun s’adxudica otra vuelta tando solicitada. Vemos cómo de nuevo se retayen los derechos de cientos de funcionarios de carrera que nun puen movese a la plaza que quieren pola negativa de l’Alministración a asignar places que tán en plantiya y que suponemos l’Alministración les tien nel puntu de mira pa futuros recortes.

Dende la Conseyería d’Educación despréciase reiteradamente a tolos colectivos que formen la comunidá educativa:

• Al profesoráu interín: vivimos va poco l’intentu de quita-yos el pagu del branu, más del 30% tán trabayando a media xornada en condiciones de total precariedá. Agora intenta negociar un alcuerdu d’interinos nuevu onde la premisa fundamental ye una rotación nel empléu achuquinando del sistema al profesoráu interín con derechos económicos alquiríos por profesoráu interíno ensin nengún derechu.
• Al profesoráu funcionariu de carrera: quitándo-y el so derechu a alquirir un destinu definitivu nel centru educativo que por antigüedá-y correspuende.
• A los centros educativos: recortándo-yos unidaes n’infantil de 3 años a aquellos que quier achuquinar adulces.
• Al alumnáu, padres, madres o tutores llegales: masificando más y más les aules, llegando en munchos centros a tener más de 28 alumnos/es por aula cuando la llei afita 25 como máximu y escepcionalmente por incorporación seronda hasta 27.

Dende SUATEA tamos fartos del despreciu col que se trata a la comunidá educativa dende la Conseyería d’Educación, de los sos engaños y de les sos burlles, polo que vamos a tar en primera fila en toles lluches que tán abiertes y les que tán por venir. Tamién damos les gracias a tol colectivu d’interinos qu’ayer xuntóse delantre de la Xunta Xeneral pa lluchar pol so futuru y que tendrá que siguir yá que munchos puestos de trabayu tán en xuegu.

Dende SUATEA pedímos-y a la Conseyera qu’adopte una postura dialogante, yá que depués de too yera lo meyor pa tola comunidá educativa, incluyida ella mesma.

Secretariáu de SUATEA — Uviéu, 21 de marzu de 2014