Aconceyamientu de SUATEA cola nueva Conseyera Educación

Aconceyamientu de SUATEA cola nueva Conseyera Educación

Esta entrada está disponible en: Castellano (Castellanu)

Güei martes, 28 de setiembre, SUATEA axuntóse per primer vegada cola nueva Conseyera d’Educación. Trátase d’un primer alcuentru billateral tres el so accesu al cargu’l pasáu mes d’agostu.  Nelli, que podemos calificar de cordial, fiximos entrega a Lydia Espina d’un ampliu dossier nel que s’esbillen los planteamientos del nuesu sindicatu y les reivindicaciones qu’anguaño consideramos urxentes.

De primeres, manifestemos el nuesu refugu énte la situación creada pola Conseyería cola so decisión de volver a les ratios d’alumnáu per aula esistentes antes de la llegada de la pandemia. Creemos que mientres se caltenga l’alerta sanitaria, una política de precuru y prevención pasa por caltener condiciones que torguen la masificación que se produz en determinaos niveles educativos. Nun tien sentíu caltener l’escalonamientu nes hores d’entrada y salida y, coles mesmes, xuntar a más de trenta alumnos y alumnes nes aules de Bachilleratu.

Al respective de les condiciones llaborales, aportunamos na yá irrenunciable esixencia de les 23 hores llectives pal profesoráu d’Educación Infantil y Primaria, puntu nel que la Sra. Conseyera amosóse especialmente receptiva, y la llimitación nel númberu de guardies en Secundaria.

Per otru llau, nel  casu asturianu, señalamos que’l profesoráu escarez de determinaos derechos esistentes n’otres comunidaes como pueden ser l’amenorgamientu de la xornada llectiva pa mayores de 55 años o esfruten de la posibilidá de llograr permisos p’asuntos particulares (los moscosos) o los años sabáticos.

Denunciemos tamién la esistencia de distintu tratu pal personal docente de cara a la xubilación, con condiciones distintes a quien aportó a la función pública dempués del añu 2011. Especial esmolición xenéranos el fechu de que nel casu de les interinidaes, nun esiste derechu a la xubilación hasta los 67 años. Al tratase d’una competencia del Gobiernu central, pidimos a la Conseyera que se pronuncie nos órganos de coordinación estatal esistentes, nel sentíu de buscar una xubilación anticipada pal personal docente n’igualdá de condiciones. Daqué asemeyao encetemos al tratar la situación del personal interino. La Conseyera almitió que va haber qu’esperar a ver cómo trescurren los alderiques parllamentarios pa dempués dar n’estudiar la so aplicación a la situación específica d’Asturies.

Tamién comentemos la situación nueva que s’abre col procesu de reforma estatutaria anunciada dende la Presidencia autonómica. Coincidimos na importancia del anunciu y na d’encetar de manera específica, en venideros alcuentros, l’impactu que va tener na situación del Asturianu y del Gallego-asturianu dientro del ámbitu educativu.

En resume, atopamos un ambiente candial y prestosu, n’apariencia más dispuestu a escuchar y axustar que n’ocasiones anteriores. Sicasí, dende SUATEA tenemos por norma nun valorar les intenciones, por bienintencionaes que puedan ser, sinón los fechos concretos que van ser los que marquen el camín d’esti nuevu períodu de gobiernu. Esperamos de la nueva Conseyera l’adopción de midíes que dean nuna meyora sustancial de les condiciones llaborales del profesoráu, nel aumentu de la calidá de vida de la Escuela Pública depués de  sufrir l’impactu de los socesivos retayos económicos y de lleis educatives corroyentes, como foi la Llei Wert.

N’Uviéu, a 28  de setiembre 2021

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757