SUATEA y STEs denuncien los procesos d’estabiliazación

SUATEA y la CONFEDERACIÓN DE STEs PRESENTEN QUEXES ÉNTE LA UNIÓN EUROPEA Y EL DEFENSOR DEL PUEBLU DENUNCIANDO QUE LOS PROCESOS D’ESTABILIZACIÓN, ANGUAÑO, NUN CUMPLEN L’OXETIVU PREVISTU

Na situación actual, nun garanticen que’l personal docente n’abusu de temporalidá pueda llograr la estabilidá nel so puestu de trabayu y el resultáu d’estos procesos puede causar un trasiegu de docentes ente Comunidaes Autónomes bien perxudicial pa profesoráu y alministraciones.
La Confederación de Sindicatos de Trabayadores de la Enseñanza (STEs-i), na que s’integra SUATEA, presentó denuncia énte la Unión Europea por infracción al derechu comuñal y la lexislación europea al respective de los procesos d’estabilización que les distintes alministraciones educatives tán anunciando estos díes. Estos procesos que, conforme a lo establecío pola llei 20/2021 de midíes urxentes pal amenorgamientu de la temporalidá nes alministraciones públiques tienen de menguar el porcentaxe de personal interino al 8% antes del 31 d’avientu de 2024, tán semando la molición ente les persones afectaes, yá que -agora- non solo nun aseguren que’l personal docente en situación d’abusu de temporalidá pueda consiguir la estabilidá nel empléu, sinón que pon en peligru la posibilidá de siguir trabayando en réxime d’interinidá, siquier en puestos vacantes pa tol cursu.
La denuncia énte la Unión Europea sorraya que l’Estáu Español al traviés de la llei 20/2021, de 28 d’avientu, incumple abiertamente’l derechu de la Unión al establecer como midíes de estabilización procesos selectivos de llibre concurrencia, y/o un sistema d’indemnizaciones por cese que nun se contempla en tolos casos, dambes refugaes pol TXUE como sanción.
De la mesma, con fecha 16 de mayu de 2022, presentóse quexa énte la oficina del Defensor del Pueblu, motivada pola diversa y desemeyada aplicación que vienen faciendo les alministraciones públiques, tanto estatales como autonómiques, de la llei 20/2021.
SUATEA y la Confederación de STEs-i soliciten al defensor del pueblu, el Congresu de los Diputaos y el Senáu qu’activen controles pa velar pol cumplimientu de la llegalidá na aplicación de la llei 20/2021, de tala manera que non se cese a nengún emplegáu públicu temporal que s’atope ocupando puestos de calter temporal con anterioridá al 1 de xineru de 2016.
Sía que non, la responsabilidá del Ministeriu d’Educación rescampla. Nes sos manes ta coordinar los procesos d’ estabilización que les Comunidaes Autónomes tán anunciando estos díes. Nes sos manes ta’l faer que toes cumplan la llei en cuenta de burllala con ufiertes risibles nes que nun s’identifiquen, nin s’amuesen los datos que dexen identificar les places que cumplen los criterios establecíos na llei de midíes urxentes pal amenorgamientu de la temporalidá nes alministraciones públiques, pa la so ufierta nos concursos estraordinarios de méritos y nos concursu-oposición que tienen de convocase según el nuevu Real Decretu 270/2022 d’accesu a la función pública docente.

23 de mayu de 2022
Secretariaos de Confederación de STEs-i y SUATEA