SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
La xuba salarial alcordada polos sindicatos CCOO y UXT col Gobiernu central el pasáu 3 d’ochobre pa los años 2022, 2023 y 2024 nun sirve p’acabar col continuu aprobetayamientu al que tamos sometíos el profesoráu. Analizando con datos oxetivos la insuficiente xuba salarial vamos ver cómo la perda acumulada del nuesu poder adquisitivu nin siquier ye frenada colos últimos alcuerdos ente’l Gobiernu y los sindicatos firmantes.
El Gobiernu central alcordó con CCOO y UXT, que sumen la mayoría de la representación de la Mesa de Función Pública estatal, los aumentos salariales de la Función Pública pa los años 2022, 2023 y 2024.
L’anterior alcuerdu garraba los años 2018, 2019 y 2020. Esti roblólu tamién CSIF.
L’añu 2021 tuvo fuera de los procesos negociadores y al respective de 2022, el Gobiernu decidió unillateralmente una medría del 2% nos Presupuestos Xenerales del Estáu p’anguaño.
Nesta tabla podemos reparar na evolución de les nueses retribuciones mientres l’anterior alcuerdu y el tiempu ensin alcuerdu. Les midíes adoptaes dende 2018 hasta 2022 en materia salarial traduciéronse nuna perda del poder adquisitivu del funcionariáu docente del 2,65%.
L’actual alcuerdu soscritu propón una xuba fixa (cola que sí vamos poder cuntar) y una condicionada a la evolución del IPC y del Productu Interior Brutu (PIB).
(La medría del 1,5% pal 2022 tien efectos de 1 de xineru del 2023 y va abonase nuna paga, según informaciones oficiales).
Teniendo en cuenta que dende 2010 a 2018 yá atropábamos una perda de poder adquisitivu en redol al 17%, la perda acumulada a fecha actual ye del 19,65%. En 2024 vamos tener que calculala asina: 19,65% de perda actual- 6% de xubida fixa + lo que varie’l ipc dende agora hasta 2024= 13,65% + lo que varie’l ipc dende agora hasta 2024. Teniendo en cuenta que la inflación nesti últimu añu foi de más del 10% y que les previsiones pa los próximos dos años envalórase que va caltener esta tónica, la conclusión ye clara: en 2024 la nuesa perda de poder adquisitivu va tar percima del 20 %.
Dende SUATEA llevemos denunciando esta perda siguida del nuesu poder adquisitivu yá dende l’empiezu de la llamada “crisis de 2008” reivindicando añu tres d’añu:
• L’establecimientu d’una clausa de revisión salarial p’actualizar la xuba salarial a la evolución real de la inflación, que nun tea supeditada a otros valores d’evolución de la economía, y na recuperación del poder adquisitivu perdíu, y
• L’aumentu del complementu específicu autonómicu de la nuesa nómina pa superar la fienda que nos dixebra de la media salarial estatal. Consistiría na sustitución del incentivu a la evaluación, qu’unos cobren y otros non, por una medría llinial ya igual pa tolos cuerpos docentes.
Uviéu, 21 de payares de 2022
El Secretariáu de SUATEA
Esta entrada está disponible en: Castellano (Castellanu)
