SUATEA da’l so sofitu a la fuelga d’estudiantes del 24 de payares

El Gobiernu del Partíu Popular, a pesar d’atopase en minoría parlamentaria, desoi al Congresu de los Diputaos y vuelve demostrar que la so voluntá de diálogu ye falsa. L’anunciu del Conseyu de Ministros pasáu, de que l’Executivu pide a les Cortes revocar l’alcuerdu de tola oposición qu’aprobó la Proposición de Llei de paralización del calendariu LOMCE, vuelvi ser otru descaráu despreciu a la voluntá popular.

Esto significa que’l Ministeriu de Méndez de Vigo nun piensa dar nengún pasu tras na so política educativa y insiste n’imponer a final d’esti cursu académicu les reválides que falten por aplicar, la de 4º d’ESO y 2º de Bachilleratu. SUATEA, caltiense firme na so defensa de la Escuela Pública, cola esixencia de la derogación inmediata de la LOMCE, de tola normativa de retayos y del restu de contrarreformes educatives.

Arriendes d’ello, SUATEA da’l so sofitu a la fuelga d’estudiantes del 24 de payares y anima a la comunidá educativa, y a la sociedá nel so conxuntu, a solidarizase y participar nes manifestaciones convocaes.

Secretariáu de SUATEA

Uviéu, 22 de payares de 2016