Una burlla a la sociedá – El PSOE incumple la so promesa de promover la derogación de la LOMCE.

Nin siquiera nel momentu de mayor debilidá política y parlamentaria, crisis interna y desapegadura de les sos bases, el PSOE ye capaz de cumplir cola so promesa de lluchar pola derogación de la LOMCE, una demanda compartida por asociaciones de madres y padres, profesoráu, sindicatos, estudiantes y comunidá educativa polo xeneral. Arriendes de ser una promesa de tolos partíos políticos de la oposición na anterior llexislatura.
La propuesta del PSOE nel congresu supón un auténticu engañu, namás pide que nun s’aplique lo poco que queda por aplicar de la LOMCE, pa lo que propón una moratoria nos efectos académicos de les reválides, daqué que yá contempla la LOMCE pa esti cursu nel so calendariu d’implantación y qu’el mesmu Rajoy yá ufiertara nel so alderique d’investidura. El PSOE nin siquier ye orixinal nes sos trampes.
Proponen delles otres cuestiones como que l’asignatura de relixón nun sía evaluable (non que sía suprimida del currículu), o que’l nomamientu de les direcciones vuelva recayer nos conseyos escolares de los centros (cuestión importante); pero nun cuestionen el nucleu duru de la llei.
Tampoco hai nenguna referencia al financiamientu del sistema educativu (de los más baxos de la UE), al númberu d’alumnos per aula, qu’aumentó, nin a les condiciones llaborales del profesoráu sumíu nun procesu de burocratización creciente.
Tampoco paez que vaya a cuestionar el financiamientu públicu de centros privaos (eufemísticamente conocíos como “conciertos educativos”), auténticu cáncer de la equidá del nuesu sistema educativu. La defensa de la escuela pública nun paez ser una prioridá del grupu parlamentariu socialista.
Y mentanto, profesoráu y alumnáu, especialmente’l de segundu de bachilleratu, siguen sumíos nuna incertidume que, a midida que pasa’l tiempu, conviértese n’indefensión al desconocer, por casu, a qué van tener qu’enfrentase al rematar los sos estudios de bachilleratu a seis meses vista.
N’Asturies, la situación nun ye muncho meyor. La Conseyería d’Educación, Cultura y Deporte tiennos avezaos a una doble moral consistente en condergar una llei, la LOMCE, que depués apliquen dilixentemente, como asocedió’l cursu pasáu coles reválides de sestu de Primaria. Nun contribuyó a solucionar la incertidume de les reválides, caltién les xornaes llaborales más llargues del profesoráu nel Estáu español (incumpliendo una modesta promesa del conseyeru consistente n’amenorgar una hora complementaria selmanal del so horariu), venceya parte de les retribuciones a la superación d’una evaluación, daqué único nel Estáu, que, amás, esclúi a parte del profesoráu, fai de menos a los sindicatos que tienen que faese oyer a base de sentencies xudiciales que, una y otra vez, conderguen a l’alministración educativa, y fai oyíos sordos a los resolvimientos aprobaos, munchos por unanimidá, na Xunta de Personal. Por nun falar de los defectos estructurales de munchos centros, el zarru d’otros, o la permanencia d’alumnos en barracones mientres años.
Dende SUATEA, siguimos esixendo la total derogación de la LOMCE, l’establecimientu d’una nueva llei que priorice inequívocamente a la escuela pública por acio una dotación presupuestaria y de personal que dexe que la igualdá d’oportunidaes nun sía mera retórica, especialmente nestos momentos de precariedá y probeza estendida y creciente. Sobren razones entós pa sofitar la fuelga convocada pol Sindicatu d’Estudiantes pal próximu 24 de noviembre.
Por too ello, consideramos que la propuesta del PSOE ye namás “un llaváu de cara” envolubráu en palabres grandilocuentes como que la LOMCE ye “una contrarreforma segregadora y intervencionista qu’ataca directamente a la igualdá d’oportunidaes”, pero que nun enceta’l fondu del problema, dexando la “solución” pal futuru.

Uviéu, a 15 de payares de 2016