La paralización de la LOMCE nel Congresu los Diputaos

La paralización de la LOMCE alderícase mañana nel Congresu los Diputaos.
SUATEA encamienta a la Conseyería d’Educación a nun siguir cola so implantación  n’ Asturies.

 Mañana llega al congresu de los Diputaos una Llei que promueve la paralización de la LOMCE a instancies del PSOE, lo que puede suponer una bona cuelma a la Llei Wert, que na so implantación ta xenerando situaciones anormales nel sistema educativu. La priesa na so aplicación per parte del Gobiernu central ta suponiendo graves perxuicios pal alumnáu, como foi insistentemente denunciao pola comunidá educativa. La LOMCE básase na segregación del alumnáu y na introducción de reválides, dalgunes d’elles de calter decisoriu.

Por ello, el martes 5 d’abril podría aprobase por aciu  otra Llei, la paralización del calendariu d’aplicación de la LOMCE. La propuesta de paralización de la Llei Wert podría tener el sofitu de casi tola oposición y, polo tanto, ser una derrota del gobiernu estatal en funciones y del so ministru d’Educación, Méndez de Vigo.

Munchos de los grupos parlamentarios alcordaron en 2013 promover la derogación de la LOMCE si algamaben la mayoría nel Parlamentu. Otres fuerces polítiques recién manifestaron na campaña electoral la mesma intención. Por ello, mañana podría dase una derrota de les posiciones del gobiernu y forzar que’l ministru aceptare caltener la PAU- que la Llei Wert sustitúi por  una reválida decisoria-, como tán pidiendo les Universidaes o a esaniciar les reválides de 6^u de primaria, que la so realización ta prevista pal  próximu mes de mayu.

Nel casu asturianu, la reválida de 3^u  de Primaria nun foi realizada’l cursu pasáu. Sí lu foi n’otres CCAA- lo que choca  cola priesa la Conseyería na aprobación de los currículos de secundaria. Esta postrera midida provocó importantes protestes en numberosos IES de secundaria qu’esixíen al Conseyeru asturianu la paralización de la implantación d’estos currículos n’aspeutos como la evaluación del alumnáu o la ellaboración de les nueves programaciones.

Llegaos al tercer trimestre, los centros educativos asturianos siguen sufriendo les consecuencies de les nefastes polítiques marcaes pola LOMCE. Sigue ensin haber normativa publicada sobre evaluación. Los nuevos PMAR que se tán impartiendo ( programes de meyora del aprendizaxe y el rendimientu que sustitúin a los anteriores de Diversificación) tampoco cunten con marcu normativu que los regule. Desconozse si va haber prueba de reválida en 6 ^u de Primaria… Otra cuestión d’enorme relevancia ye que nestos momentos, nos IES, tendría d’empobinase al alumnáu académicamente: al alumnáu anguaño en 3^u d’ESO, la LOMCE  oblígalos a optar por itinerarios segregaos de cara a una reválida que de nun ser superada nun podríen siguir colos estudios. Tampoco hai nenguna posibilidá de realizar orientación profesional y llaboral pal alumnáu qu’agora ta en 4^u d’ESO (desconocen qué materies se deben escoyer pa optar por determinaos estudios universitarios) o en  1^u de Bachilleratu que tampoco saben si van tener PAU o les nueves pruebes qu’entá nun tán diseñaes.

Por too ello, SUATEA esixe a la Conseyería d’Educación una clara posición sobre la paralización de la LOMCE como asina lo pidió apocayá’l mesmu Parlamentu Asturianu nuna Proposición non de Llei aprobada colos votos de Podemos, IX y el mesmu PSOE.

Ye’l momentu d’acabar cola incertidume de miles de families y de paralizar l’aplicación d’una Llei nefasta pa la enseñanza pública y la so comunidá educativa.

Secretariáu de Asturies de SUATEA-STEs

Uviéu 4 d’abril de 2016