Non al despidu de cuidadores del tresporte escolar

Esti añu estrenémoslu, nel ámbitu educativu, con un tétricu regalu de los reis ALSA del tresporte: el despidu de 170 cuidadores del aumnáu que viaxa nel tresporte escolar. Son trabayadores que lleven trabayando en munchos casos más de 10 años pa les estremaes empreses que se ficieron cargu, per aciu de concursu, del tresporte escolar pa la Conseyería d’Educación. A lo llargo de toos esos años renováron-yos el contratu y siguieron trabayando. Eso sí, lo mesmo qu’agora, socontrataes pola empresa de tresporte axudicataria al través de delles empreses d’emplegu temporal. Consecuencia d’ello yeren los miserables contratos y sueldos que recibíen: menos de 200€ en munchos casos.

Sueldos miserables y tratu indignu. A día de güei, a munches d’elles, entá nun se-yos comunicó’l so despidu. El día qu’entamó’l segundu trimestre del cursu atopáronse coles persones que les reemplazaben, persones ensin esperiencia y de les que les despidíes dulden tengan les acreditaciones necesaries pa trabayar con persones menores.

La Educación ye un serviciu públicu que necesita non solo del personal docente sinón d’otros complementarios como‘l tresporte y los comedores escolares p’atender cola calidá que merecen l’alumnáu y les families. Un  personal con sueldos y condiciones llaborales dignes ye garantía  de prestación d’un serviciu dignu y óptimu. D’ello ye la máxima responsable la Conseyería d’Educación y Cultura.

Por too ello,  dende SUATEA:

• Apoyamos la reivindicación de subrogación del contratu pa toles trabayadores despidíes.
• Demandamos un tratu salarial y contractual dignu pa toles/oos estos trabayadores de servicios complementarios.
• Demandamos a la Conseyería d’Educación qu’esixa a estes empreses la sobrogación contractual d’estes trabayadores.
• Esiximos a la Conseyería d’Educación la non esternalización de servicios y, naquellos que seya estrictamente necesaria, la introducción na so contratación de cláusules étiques que blinden la esplotación salarial y garanticen unes condiciones llaborales dignes.

El Secretariáu de SUATEA
27 de xineru de 2017