Coronavirus, SUATEA esixe que se convoque a los sindicatos pa entamar planes d’actuación

FRENTE A LA CRISIS PROVOCADA POL CORANOVIRUS, SUATEA ESIXE A LA CONSEYERÍA QUE SE CONVOQUE A LOS SINDICATOS PA ENTAMAR PLANES D’ACTUACIÓN

Güei pela mañana, 10 de marzu, la Conseyería d’Educación, en trés xuntes celebraes a lo llargo de la mañana, informó a les direcciones de los centros educativos d’Asturies de les actuaciones que la Conseyería d’Educación vien desenvolviendo, en coordinación col Ministeriu de Sanidá y la Conseyería de Salú delPrincipáu d’Asturies y como parte del Comité de Coordinación COVID-19. 

Dende SUATEA, entendemos que yera una xunta oportuna y necesaria dada l’alarma que ta provocando nos centros educativos asturianos la medría esponencial de los contaxos en delles CCAA y la interrupción d’actividaes llectives y zarros temporales de centros educativos en País Vascu, Madrid y La Rioxa. Ye imprescindible que los centros tengan información y conseyos sobro la enfermedá, cómo prevenila y qué faer en casu de sospecha o de confirmación d’infección del personal o alumnáu del centru.  

Pero tamién demandamos dos actuaciones fundamentales:

–              Que se convoquen de forma urxente los Comités  de Salú Llaboral y Prevención de riesgos pa establecer protocolos d’actuación específicos pa esta situación escepcional.  Cualquier midida de protección tien de garantizar la protección afayadiza de les persones trabayadores d’aquellos riesgos pa la so salú o la so seguridá que nun puedan evitase o llindase abondo por aciu l’usu de medios de protección colectiva o l’adopción de midíes d’organización del trabayu. La información y la formación son fundamentales na protección de les persones en contactu con casos n’investigación o confirmaos y naquellos que presenten riesgu d’esposición al virus.

–              Que se convoque a les Organizaciones Sindicales p’analizar la situación y los efectos qu’esta crisis sanitaria pueda tener nes condiciones llaborales del profesoráu: zarru temporal de centros, xustificación d’ausencies per parte de les persones que sían posibles portadores o que tean enfermes, etc.

Uviéu, 10 de marzu de 2020