Home > Comunicaos > Valoración del cursu 2016 y perspectives pal 2017

Valoración del cursu 2016 y perspectives pal 2017

Educación n’Asturies

Hai qu’esixir cambeos que demuestren que, como diz el Sr. Conseyeru, “ta superáu y dexáu atrás el contestu de crisis”

VALORACIÓN DEL AÑU 2016

Nel añu 2016 la educación asturiana caltúvose constreñida pol contestu de retayos nos que llevamos somorguiaos dende va dellos años. Esto traduzse na ausencia de meyores tantu no qu’a les condiciones llaborales del profesoráu respecta como n’otres cuestiones como les reformes y/o ampliaciones de los centros educativos, cierres d’unidaes, etc.

Ye un periodu nel que nun se vivieron los cambeos deseables, sobremanera teniendo en cuenta que cola nueva llexislatura prometíense soluciones a cuestiones qu’entá güei siguen enriba de la mesa:

  1. En dellos casos, tuvieron que ser los tribunales quienes obliguen a l’Alministración a retirar dalgunes de les midíes impuestes unilateralmente. Un exemplu son les sentencies del profesoráu itinerante qu’obliga a Educación a pagar desplazamientos según el concuerdo robláu en 2001. A día de güei, a pesar del recursu interpuestu por SUATEA, entá nun se modificaron les instrucciones d’entamu de cursu que caltienen los criterios de pagu que fueron anulaos polos xueces.
  2. Nel mes de febreru foi aprobada, col sofitu de tolos grupos políticos salvo’l PSOE, una PNL (proposición non de llei) qu’encamienta a la Conseyería a negociar un nuevu alcuerdu d’interinidá que sirva pa dar más estabilidá a un colectivu que solamente reclama lo que n’otros munchos territorios y se tien. Nenguna intención hai d’empecipiar esti procesu de negociación a pesar de les movilizaciones realizaes y, les consecuencies más sangrantes, sufriéronles los y les docentes que fueron espulsaos de les llistes por nun poder presentase a la oposición. Nuevamente tuvieron que ser los recursos interpuestos por les persones afectaes los que dexaren iguar los numberosos erros nes baremaciones. Nesti sentíu ye reseñable qu’entá tamos esperando la publicación de los llistaos definitivos d’interinidá tras la corrección de los mesmos.
  3. L’aplicación de la LOMCE llevóse “a raxatabla” cola oposición de la comunidá educativa. A pesar de les crítiques a la llei, n’Asturies fízose la reválida de 6º de Primaria, poniendo unos recursos económicos qu’arralecen y sobrecargando de trabayu al profesoráu de Primaria.
  4. Foi’l 2006 l’añu nel que l’amenorgamientu de matrícules en 3 años saldóse nos centros públicos col cierre de numberoses unidaes y la fusión de colexos mientres se caltuvieron intactes el númberu d’unidaes nos privaos concertaos. Ante la demanda d’un amenorgamientu de ratios y del caltenimientu de los sofitos n’Infantil, solo nos atopamos oyíos sordos; les xuntes coles Organizaciones Sindicales pa informar  d’estes midíes llegaron mal y tarde
  5. Nel mes de xunu roblóse l’Alcuerdu del sistema de reserva de docentes con discapacidá. Tres la so aplicación nes axudicaciones d’agostu y setiembre, solo pue facese una valoración negativa, pues namá dexó acceder a dos persones, quedando los oxetivos pa los que foi robláu bien llueñe de ser alcanzaos.
  6. Tocántenes a la implantación de la llingua asturiana, entá nun se cumplieron les espectatives de creación de la especialidá y queda pendiente’l compromisu del cambéu del currículu d’Infantil pa incluyila. Nun va cumplise, poro, la posibilidá d’ufiertar empléu públicu por esta especialidá pa crear puestos de funcionarios de carrera.
  7. Los centros educativos son espacios onde la participación de personal non docente xuega un papel importante, especialmente aquellos profesionales imprescindibles na atención a la diversidá. Ye’l casu de los auxiliares educadores y fisioterapeutes que nestos momentos tán reivindicando unes condiciones llaborales dignes ante una Conseyería que nin los escucha nin los recibe.
  8. El profesoráu asturiano sigue tando ente’l peor pagao de tol Estáu y quien tien más carga horaria. La firma d’alcuerdos como en Cantabria o en Baleares tendríen de ser un exemplu pa un Conseyeru qu’afirma “superáu y dexáu atrás el contestu de crisis económica”. L’incumplimientu de los Alcuerdos de plantiyes en Primaria y Secundaria y l’aumentu del horariu lectivu fueron la forma qu’adoptaron unos de los mayores retayos na educación asturiana, aumentar carga docente y amenorgando la posibilidá de la realización de desdobles y sofitos. A esti hai que sumar l’alta tasa d’interinidá y l’eleváu porcentaxe de medies xornaes que constitúin una verdadera torga a la de realizar proyectos y programes con tiempos necesarios pal so desenvolvimientu y coordinación.

 

Tamos, en resume, terminando un añu nel que nun s’invirtió n’educación. Los retayos caltuviéronse condicionando la calidá educativa y cargando tol pesu enriba un profesoráu sobrecargáu de xeres docentes y enfrentándose con una cada vez mayor burocracia consecuencia, en gran midida, de l’aplicación estricta de la LOMCE.

PERSPECTIVES PAL 2017

De cara al próximu añu, dende SUATEA consideramos que l’apueste pola educación pública tien que ser ún de los motores que motiven l’empléu y la permanencia y enraigonamientu de los y les moces n’Asturies. La fixación de población nes zones más alloñaes del centru per aciu de propuestes de estabilización de la plantiya tendría que ser tamién oxetu d’analís y reflexón, yá que sería un elementu dinamizador que dexaría empezar proyectos de too tipu nos colexos ya institutos de les zones rurales. Esti apueste supondría amosar la reconocencia l’esfuerzu y responsabilidá que recái sobre’l profesoráu, pondría les bases p’ameyorar les sos condiciones llaborales, pa estabilizar la plantiya, afitar población y ufiertar una salida llaboral a la mocedá qu’agora emigra. Nesti sentíu, dalgunes de les midíes que se deben tomar son les siguientes:

  • En primer llugar y nel marcu de la reversión de los retayos derivaos del Decretu 14/2012, ye imprescindible l’amenorgamientu de les hores lectives que fueron amontaes n’Asturies pal profesoráu de Secundaria, de manera más gravosa que nel restu de CCAA. Dos hores lectives más suponen una medría nel númberu d’alumnáu que tien d’atender cada docente, un aumentu de les xeres derivaes de la coordinación con equipos educativos, del númberu de pruebes y cuadiernos que correxir, de clases que preparar, d’informes pa les families que rellenar, d’actividaes estraescolares que programar y un llargu etcétera que pesa sobre un profesoráu enchíu tamién poles xeres burocrátiques. Con esta mesma idea, ye necesario esixir el cumplimientu del Alcuerdu de plantiyes de Primaria, dotando con un tutor d’esta especialidá a cada unidá, dexando d’imponer les tutoríes a los especialistes, aumentar la carga docente y con ello amenorgando la posibilidá de la realización de desdobles y sofitos.
  • De segundes, habría que desenvolver l’artículu 105 de la LOE que trata, ente otres cuestiones, el cambéu de la xornada pal profesoráu mayor de 55 años. Dichu artículu recueye la posibilidá de “favorecer la sustitución parcial de la xornada lectiva por actividaes d’otra naturaleza ensin amenorgamientu de les sos retribuciones”. Ye una midida, pola que lleva aporfiando la Xunta de Personal Docente, qu’incidiría directamente na creación d’empléu y remocicamientu de les plantiyes docentes.
  • De resultes de l’aplicación de los apartaos anteriores, los centros educativos tienen de ver amontada la dotación de docentes pa poder garantizar una fayadiza atención educativa al alumnáu. Tienen de torgase les contrataciones a medies xornaes, llindándoles a casos escepcionales y aumentar la estabilidá naquellos centros nos que’l profesoráu camuda nun eleváu porcentaxe cada añu, proponiendo midíes como la contratación mientres dellos cursos consecutivos prorrogables.
  • Per otru llau, teniendo en cuenta’l contestu estatal d’un posible Pactu Educativu, nun cabría siguir realizando la reválida de sestu de Primaria y nin llevar a cabu la de 4u de la ESO. Supondría una incongruencia entá mayor que la del cursu pasáu, marafundiando’l dineru público, torgando’l trabayu del profesoráu y marcando académicamente al alumnáu dende edaes bien tempranes.
  • P’acabar, en 2017 va dase la revisión de los conciertos colos centros privaos. Son centros que segreguen al alumnáu, qu’escueyen al profesoráu en función d’intereses ideolóxicos y empresariales y sobre los que nun hai capacidá real de control del so funcionamientu magar de tar financiaos con fondos públicos. Nun puede ser que se sigan cerrando unidaes y escueles públiques, que son la única alternativa real d’inclusión y compensación de desigualdaes y se calténgan los conciertos. Hai qu’esixir la restitución de les aules suprimíes el cursu pasáu, de les places docentes amortizaes de resultes d’ello y l’amenorgamientu inmediatu de los conciertos naquelles zones onde la escuela pública tendría la posibilidá d’asumir l’alumnáu.

 

Secretariáu de SUATEA

Uviéu, 15 d’avientu de 2016

Esta entrada tamién se puede consultar en: Castellanu