Piésllense aules públiques mientres se caltienen les concertaes

Piérdense más unidaes na escuela pública mientres se va caltener la ufierta na enseñanza privada concertada.

El día d’ayeri la Conseyería d’Educación comunicó a los centros d’Educación Infantil y Primaria el númberu d’unidaes (aules) que s’autoricen pal próximu cursu 2017/2018. Ye esti un momentu clave pa los colexos en cuantes que van determinar (especialmente en 3 años) el númberu de places que van poder ufiertar a les families que quieran matricular a los sos fíos nos siguientes  cursos y niveles.

Dende SUATEA reparamos con pesar que les declaraciones del Conseyeru sobre’l fin de la crisis y los presupuestos qu’estruyaben el gastu n’educación, nun son más que puestes n’escena que nun casen coles polítiques qu’apliquen y piensen siguir aplicando. Nesti casu atopamos con que non solo nun hai posibilidá de recuperar les unidaes perdíes el cursu pasáu (siete na ciudá de Xixón) sinón qu’hai nuevos retayos que van amenorgar la ufierta per parte de la escuela pública.

Ente les propuestes qu’impón l’Alministración atopamos fusiones de grupos n’Infantil, perda d’unidaes en Primaria y la imposibilidá d’ufiertar más places que les que correspuenden a una aula naquellos centros que sufrieron zarros esti mesmu cursu.

Perder una unidá en 3 años d’Infantil, que ye cuando empieza de normal la escolarización de los neños y neñes, tien efectos inmediatos y a mediu y llargu plazu. Lo primero que puede asoceder ye la perda de profesoráu de sofitu y la consecuente sobrecarga del restu de docentes, pero tampoco ye baladí el fechu de que se condiciona’l futuru del centru, que va ver amenorgaes les unidaes consecutivamente según avanza l’alumnáu pelos siguiente cursos.

Ayeri celebróse una xunta cola Xunta de Personal Docente y magar se solicitó información sobre datos d’escolarización y el númberu d’unidaes, en nengún momentu se mos comunicó que yá fuera unviada la información sobre les autorizaciones pal próximu cursu. La falta d’información o qu’esta llegue tarde o d’improvistu nuna xunta ye daqué que llevamos denunciando les organizaciones sindicales dende hai enforma tiempu y ante la que l’Alministración nun paez tener interés en solucionar. Tal falta de tresparencia nun puede ser almitible y nun lleva en concencia nin a xenerar enfotu nin a amosar una actitú dialogante y negociadora como correspuende a los organismos públicos.

Estos nuevos retayos danse nun contestu de renovación de conciertos educativos colos centros privaos. El próximu mes de febreru va salir un Resolvimientu de la Conseyería d’Educación que nun va traer sorpreses, estos conciertos van caltenese y la ufierta privada concertada nun va sufrir nenguna cortapisa cuando s’abra’l periodu de matrícula. Atopamos con un Gobiernu qu’utiliza a la enseñanza pública como subsidiaria de la privada, que gracies a l’aplicación de la LOMCE va ver aseguráu’l conciertu a lo llargo los próximu 6 años. Los retayos d’unidaes produciéronse, tán produciéndose y van producise nel futuru na escuela pública.

Énte tal situación, dende SUATEA nun vamos quedar impasibles, n’andecha cola comunidá educativa de los centros afectaos vamos convocar movilizaciones a la vuelta de vacaciones. Ye imprescindible dar a conocer y denunciar esta situación que lleva a un serviciu públicu tan trescendente como la educación a un caleyón matáu.

Uviéu, 20 d’avientu de 2016