SUATEA encamienta al Conseyeru d’Educación a pone-y acabu a los agravios al colectivu

Énte la publicación del llistáu de Profesoráu Interín, SUATEA encamienta al Conseyeru d’Educación a pone-y acabu a los agravios al colectivu.

Güei publíquense les llistes de profesoráu interín. El 25 d’agostu ábrese’l plazu pa que quien superaron el postrer procesu selectivu y les persones en llista fagan peticiones de vacantes pa’l próximu curso. Pero los problemes siguen: a les reclamaciones correspondientes al procesu selectivo en delles especialidaes de  Primaria -estráu d’errores como denunció SUATEA a lo llargo del mesmu- xúntense peculiaridaes que namás afecten a Asturies (distribución de places por tribunal, places pa profesoráu con discapacidá, usu o non de medios informáticos, aspirantes escluyíos ensin motivos…).

Esto ye dalgo que’l nuevu Conseyeru d’Educación ha d’iguar, pues trátase d’elementos que nun dependen más que de la voluntá de la Conseyería. Volviendo a les llistes que se publiquen güei, cúmplense los piores augurios, son unes llistes estraes d’erros na baremación, ye inalmisible que nun hebia un plazu de reclamaciones con tiempu abondo pa iguar esta situación antes de qu’entame’l procesu d’axudicación el 25 d’agostu, nun procesu qu’afecta a miles de docentes interinos. Nel restu de CCAA la existencia d’una adxudicación provisional y otra definitiva nun procedimientu habitual. N’Asturies incomprensiblemente, el profesoráu interín nun tien esi derechu. SUATEA va esixir que se publiquen unes nueves llistes enantes del día 25 nel que se depuren tolos erros detectaos, principalmente de nun baremar notes d’oposiciones de procesos anteriores.

Como exemplu d’esta situación ye la presencia d’una docente qu’apaez con 48 puntos nel baremu cuando debería apaecer con 79, y como esti munchos otros nuna situación mui asemeyada. Esta docente alcuéntrase indefensa por culpa de les males práctiques de l’alministración nun permitiendo que pueda acceder a una vacante na primer convocatoria, condenándola nel meyor de los casos a tener qu’esperar a la segunda convocatoria p’acceder al so puestu de trabayu.

El plazu pa facer peticiones tapezse cola publicación de la convocatoria y de les vacantes susceptibles d’adxudicase. Les persones aspirantes a interinidá tienen hasta’l 27 d’agostu pa facer les peticiones. Y namás usando soporte informáticu.  Miles de personas usando un sistema que va dos cursos comportó graves problemes y dexó a decenas d’interinos ensin trabayu.

Munchos equipos directivos presentaron reclamaciones a les plantiyes que l’Alministración-yos concediera pal próximu cursu y en munchos casos la respuesta foi negativa pesie a que les necesidaes de los centros son reales. Dende SUATEA disiximos la cobertura de toles necesidaes y qu’eses places apaezan na convocatoria del 25 d’agostu p’atender de forma amañosa a tol alumnáu y más concretamente pa garantizar l’atención a la diversidá y que per un aula de primaria nun pasen hasta 6 docentes como ocurrió l’otru cursu. Tamién ye urxente la reducción horaria al profesoráu de secundaria pues l’actual carga llectiva torga desendolcar el llabor docente, sobrecarga de grupos y alumnáu y quita empléu interín.

La publicación de l’adxudicación ta prevista’l 31 d’agostu ¡Y la incorporación del profesoráu a los centros el día 1 setiembre! Esto amuesa enforma’l despreciu d’esta alministración respecto a los sos trabayadores, a los qu’obliga a presentase nel nuevu centru de destinu ensin tiempo material pa organizar la so vida personal. Y ello fáise con llistes de places ensin claridá y ensin definición de les mesmes.

Recordemos que l’alministración permite a una parte de los docentes de secundaria que vaigan al centru onde trabayaron l’otru cursu, pero namás si saquen na adxudicación del día 31 una vacante nueva. Con ello prívase a una parte del alumnáu del derecho a ser evaluáu pol profesor o profesora que-y diera clase l’otru cursu.

El recursu sistemáticu a les medies xornaes fai medrar la precariedá nesti colectivo. Esto sirve pa mazcarar les cifres d’empléu docente y pa engordar les de les personas que na nuestra Asturies malviven con un empléu a tiempu parcial.

Y p’acabar, tamos viendo cómo l’Alcuerdu sobre ellaboración y xestión de llistes d’Interinos robláu por ANPE y FETE cola anterior Conseyera ta yá ufriendo efectos negativos na ellaboración de les nueves llistes procedentes del otru procesu selectivu. El malcontentu de la mayoría del profesoráu interín con esta regulación fáimos reiteranos na petición de la negociación d’un alcuerdu nuevu que protexa al Profesoráu Interín Asturianu y que garantice la estabilidá nel empléu d’un colectivu que representa más de la cuarta parte de la plantiya docente n’Asturies.

El nuevu Conseyeru tien el retu d’acabar coles discriminaciones que sufre’l profesoráu interín asturianu. Lo que vieno pasando n’Asturies nos últimos cursos nun puede volver a pasar.