OPE: SUATEA aporfía na necesidá d’un nuevu alcuerdu d’interinidá

PARALELAMENTE A LA UFIERTA D’EMPLEGU, YE NECESARIA LA NEGOCIACIÓN D’UN NUEVU ALCUERDU D’INTERINIDÁ

Na mañana de güei, 18 d’avientu, celebróse la primer xunta de la Mesa Sectorial de negociación na que se trata la Ufierta Pública d’Empléu docente de 2017, según una propuesta d’alcuerdu de la mesa sectorial de negociación de personal docente sobro calendariu y fixación de determinaos criterios básicos aplicables a los procedimientos selectivos del periodu 2018-2022.

L’Alministración presentó una OPE pa 2017 de 878 places, procedentes de la tasa de estabilización y de lla tasa de reposición de 2017, según la convocatoria de 2018:
Al respective de la convocatoria de 2018, presentáronmos el llistáu d’especialidaes de Secundaria y de Formación Profesional ensin indicar el númberu de places de cada especialidá.
DOCUMENTU COLES ESPECIALIDAES UFIERTAES POLA ALMINISTRACIÓN.

Dende SUATEA realizáronse les siguientes valoraciones y plantegamientos:

1. Les places de la tasa d’estabilización respuenden a l’aplicación del Alcuerdu de 29 de marzu. Nesi alcuerdu aceutaron amenorgar al 8% la tasa d’interinidá, que n’Asturies na actualidá ta nun 31% (a nivel estatal ye de 25%). Dende SUATEA y los STEs refuguemos nel so momentu l’Alcuerdu de 29 de marzu porque yéramos conscientes de qu’apautaben la estabilización de les plantiyes y NON l’afitamientu del personal interino qu’ocupa les places. Amás, consideramos una irresponsabilidá apautar l’amenorgamientu drásticu de la tasa d’interinidá al 8% ensin midíes d’estabilidá que protexan l’emplegu del personal interino o ensin propuestes d’afitamientu pa que’l personal interino entre na función pública.

2. No que cinca a la ufierta d’especialidaes en sí, valoramos positivamente que consideren dos aspeutos que propuxéramos dende SUATEA: que les OPEs finalmente se realicen en trés convocatories y s’executen en cinco años, y, además, que se convoquen 27 especialidaes, una propuesta muncho más razonable que les previstes que se cifraben en 61 pa 2018.
Sicasí, llamentamos que nun podamos conocer el desglose de places por especialidaes hasta la convocatoria de les oposiciones, cuando na mayoría de les CCAA yá la conocen de forma detallada.

3. Al respective de la propuesta d’alcuerdu sobre calendariu y fixación de determinaos criterios básicos aplicables a los procedimientos selectivos del periodu 2018-2022, manifestamos que l’ámbitu de negociación tien de tar enmarcáu na Mesa Sectorial d’Educación y que vemos innecesario que se presente una propuesta d’alcuerdu p’apautar lo que se debe axustar en mesa. Esta propuesta recueye aspeutos como la coordinaciópn ente les CCAA nes convocatories, el calendariu de les OPEs y la so execución, compromisu de conocer les especialidaes enantes del 15 de payares de cada añu, etc.

4. El sistema d’ingresu na función pública docente, que ye de regulación estatal, tamién xuega un papel primordial nesti momentu. Tuvo axustándose en Mesa sectorial del Ministeriu d’Educación el modelu d’ingresu na función pública docente dende’l mes de xunu hasta’l pasáu 30 de payares. Dende los STEs-I, plantegamos al Ministeriu d’Educación que, por aplicación del alcuerdu de 29 de marzu, la situación ye escepcional y rique soluciones escepcionales. Por ello, ensin arrenunciar al nuesu modelu d’accesu estremáu o a la posibilidá de desenvolver l’artículu 61.6 del EBEP, que dexa l’accesu a la función pública por concursu de méritos, tamos defendiendo, por responsabilidá énte la incertidume ya inseguridá de miles de profesores interinos ya interines que pueden ser despidíos, un accesu transitoriu qu’ameyore sustancialmente el RD 276/2007 anguaño vixente. Lo más relevante de les negociaciones ye qu’el MECD nun acepta la propuesta de la mayoría sindical de que les pruebes nun sían eliminatories, un elementu que consideramos esencial nel contestu nel que se van a desenvolver estos procesos selectivos. Que les pruebes nun seyan eliminatories ye absolutamente determinante pa que los y les opositores, al compensar les notes algamaes nes distintes pruebes, puean llegar a la fin de la fase d’oposición y sumar la fase de concursu.

5. Nel ámbitu asturianu, el profesoráu interino va vese doblemente perxudicáu: amás d’estes ufiertes masives d’empléu ensin un sistema d’ingresu fayadizu a los sos intereses, van vese afectaos pol Alcuerdu de regulación de llistes d’interinidá anguaño vixente, que supón la rebaremación de les llistes dempués de cada procesu selectivu de cada especialidá y onde nel baremu la nota llograda nes pruebes puede representar el 40% o inclusive más.
Consideramos imprescindible venceyar la ufierta de places que l’Alministración punxo sobro la mesa cola negociación d’un nuevu Alcuerdu de regulación de llistes d’interinidá que garantice la estabilidá del colectivu, tal como asocede n’otres CCAA. Ye menester recordar que’l profesoráu n’Asturies ta reguláu con unes condiciones muncho más precaries en comparanza a otros territorios.

Pa SUATEA ye prioritaria la defensa de les y los trabayadores que tuvieron al serviciu de l’Alministración mientres munchos años ensin otra alternativa que la inestabilidá y la precariedá. Llevamos meses alvirtiendo que l’amenorgamientu de la tasa d’interinidá al 8% nun puede convertise nun ERE tapáu que termine con miles de profesionales espulsaos de la enseñanza. Por too ello, esiximos que los inminentes procesos estraordinarios se faigan, de manera transitoria, so un modelu de prueba única ensin partes eliminatories. Y, amás, la Ufierta d’Emplegu Públicu docente que s’apruebe tien de venir acompañada de la negociación d’un nuevu Alcuerdu d’interinidá qu’acabe pa siempres cola rebaremación y la rotación.

Uviéu 18 de payares de 2017