Negociación de Plantiyes – Cursu 23-24

El día 2 de marzu celebróse una Mesa Sectorial telemática ente la Dirección Xeneral de Personal Docente, la Dirección Xeneral de Función Pública y los sindicatos que formen parte de la Mesa Sectorial d’Educación non universitaria p’axustar les plantiyes docentes de los centros públicos de cara al cursu 2023-2024.

Según los datos daos pola directora xeneral de personal docente, el númberu total de puestos pal próximu cursu ye 9.519 (71 más que los d’anguaño). Cifra que, pendiente de próximes negociaciones, solo incorpora’l 30% de les alegaciones realizaes polos centros.

Tocántenes al aspeutu formal, como cada añu, espresemos el nuesu malestar porque nun se faciliten los datos pertinentes pa la negociación nun formatu -tipu fueya cálculu- que dexe analizar/comparar la so evolución curso tres cursu, nin los datos referíos al númberu d’unidaes de cada centru; estes postreres, anque determinen  la plantiya, nun se someten a negociación. En plenu sieglu XXI, siendo la Competencia Dixital una competencia básica recoyida pola LOMLOE y esixida a tol profesoráu yá dende’l procedimientu d’inscripción nes pruebes d’ingresu, consideramos que’l fechu de nun facilitar a la parte social  los datos necesarios pa la negociación nun formatu accesible pal so tratamientu, namá puede interpretase de dos formes: incompetencia de l’alministración o falta de tresparencia cola parte sindical.

En cuanto al conteníu, SUATEA considera que la propuesta presentada primeramente ta bien per debaxo de les necesidaes reales de profesoráu que precisen los centros y que se compensen, más tarde y ensin negociación, con esa otra plantiya paralela de “necesidaes autorizaes”, d’ende que la plantiya orgánica nunca recueye la totalidá de los puestos docentes necesarios, que son los que tuvieron ocupaos por personal interino munchos más años de los llegalmente establecíos, y que tendríen de ser oxetu d’estabilización. Amás:

• Nun se recueye l’amenorgamientu a ventitrés hores llectives nel Cuerpu de Maestros, nin l’amenorgamientu de dos hores a tol profesoráu mayor de 55 años. Cumplir con estes demandes llegales, asumíes yá por munchos territorios, fadría necesario amontar les plantiyes en, aprosimao, 700 puestos.

Amenorgar  la xornada llectiva del cuerpu de maestros a 23 hores supondría crear más de 400 puestos. Esta ye una demanda de toles organizaciones de la Xunta de Personal Docente y un encamientu de la Llei 4/2019, de 7 de marzu, de meyora de les condiciones pal desempeñu de la docente.

Nel últimu censu electoral (2022) apaecen 3.158 persones mayores de 55 años, polo qu’envaloramos en más de 300 places les necesaries p’amenorgar la so xornada llectiva en 2 hores selmanales.

• Llama l’atención el descensu siguíu de puestos na enseñanza básica nos últimos años, que s’acentúa pal próximu cursu con un amenorgamientu en redol a 60 puestos nes especialidaes del Cuerpu de Maestros, principalmente n’Educación Infantil y Educación Primaria. Anque quiera xustificase esta perda pol descensu nes nacencies, lo cierto ye qu’esta baxada paez tocar fondu en 2020 y empieza a repicar tímidamente. Ver tabla 1.  Caltener los puestos, inclusive amontalos, ye obligao pa poder ufiertar una respuesta afayadiza como serviciu públicu, al altor de la llegalidá vixente tocantes a inclusión, coeducación, bienestar emocional o dixitalización. Too esto implica necesariamente la baxada de ratio nes aules y, poro, el refuerzu de les plantiyes, midíes que nun s’apliquen a la vista de la propuesta presentada. Tenemos d’alcordamos equí que, nos primeros años de la década de 2000,  con un índiz de natalidá enforma mayor que l’ actual, autorizóse una ratio máxima de 20 nel segundu ciclu d’Educación Infantil. El compromisu del Gobiernu con esta etapa tendría de ser fundamental, cuidao que ye la base del Sistema Educativu, de les plantiyes del restu de les etapes y, a última hora, de la supervivencia de los centros públicos. Nun pueden cerrase unidaes d’Infantil na Enseñanza Pública y siguir subvencionando les de los centros privaos.

Nun se cubren toles unidaes de Primaria con profesoráu que pueda impartir la totalidá de les árees/materies asignaes a esta especialidá nel grupu que tutoriza; lo qu’acarreta una sobrecarga de trabayu pa les y los especialistes responsables d’una tutoría y  un déficit na acción tutorial, asina qu’ésta afaise puramente a los mínimos esixíos pola normativa.

Nun se propón un aumentu de puestos d’orientación. Poro, nun se refuercen los equipos, y sigue ensin recoyese la creación del departamentu d’orientación educativa en Centros Integraos de FP; tampoco apaecen nuevos puestos de servicios a la comunidá o otros perfiles especialmente indicaos p’asumir afechiscamente la promoción del bienestar emocional, y la prevención,  detección ya Intervención énte la conducta suicida.

Nun s’inclúin los puestos de Llingua Asturiana y Gallego-asturianu, nin s’apurre nenguna previsión  o estudiu de la so inclusión nes plantiyes de cursos vinientes.

Estabilícense los puestos billingües y escarecemos de normativa clara pa la so regulación lo mesmo que d’una evaluación pormenorizada de la so incidencia en tolos niveles educativos.

Una vegada más preséntase una propuesta de plantiyes que, llueñe d’apostar pola Escuela Pública, sigue sacrificándola, torgando la estabilización del personal nos centros, negando la posibilidá de desdobles y dexando, a última hora, al profesoráu solo a la de caltener, con gran voluntarismu, la calidá que precisa y merez la nuesa mocedá. Con esta propuesta de plantiya nun ameyora la situación llaboral del profesoráu asturianu nin la calidá educativa.

añu de nacencia	númberu de nacencies	cursos escolarización en 2 Ciclu EI
2017	6.012	2020-2023
2018	5.733	2021-2024
2019	5.152	2022-2025
2020	4771	2023 -2026
2021	4780
2022	4828