Home > Profesoráu > Profesoráu interín > La movilización obliga a la conseyera a negociar otra vuelta

La movilización obliga a la conseyera a negociar otra vuelta

La presión del colectivu interín yá tien los primeros resultaos. Ayer xueves mientres cientos de trabayadores taben concentraos nun actu de protesta delantre’l gobiernu asturianu, a mui pocos metros la conseyera d’Educación Ana González anunciaba nun plenu de la Xunta Xeneral que diba a entamar otra vuelta les negociaciones coles organizaciones sindicales, depués de dales por acabaes l’otru vienres 4 d’abril al nun se llegar a un alcuerdu.

Dende SUATEA valoramos positivamente la presión fecha pol colectivu interín: la concentración delantre la Xunta Xeneral del 26 de marzu a convocatoria de SUATEA y FETE; la del 2 d’abril a convocatoria de SUATEA en solitario y la d’ayer xueves 10 d’abril a convocatoria de SUATEA, FETE y CCOO, asina como otres movilizaciones como les del profesoráu interín del Suroccidente. Toes y caúna d’elles suponen un ximielgón a la política autoritaria d’esti gobiernu que pretende imponer un modelu de rotación nel empléu pal colectivu de docentes interinos y que SUATEA ve como inaceptable.

Namás la unidá y la movilización del conxuntu de los y les trabayadores pue torgar estes pretensiones. Por eso dende SUATEA facemos un llamáu a nun baxar la guardia y a preparase pa les nueves protestes, ensin descartar nenguna forma de presión, que van facese a la vuelta de les vacaciones de primavera. Xuntos somos quien.

Esta entrada tamién se puede consultar en: Castellanu