Informe Mesa Sectorial d’Educación 18 mayu

INFORME DE MESA SECTORIAL

18 de mayu 2020

Na mañana de güei, 18 de marzu, celebróse la Mesa Sectorial d’Educación. Primeramente, l’Alministración unviónos un borrador d’Instrucciones pa la desescalada nel ámbitu del personal docente de los centros públicos dependientes de la Conseyería d’Educación, supuestamente como documentu pa negociar. Dende SUATEA planteguemos un claru refugu a les actuaciones de la Conseyería y al borrador presentáu:

Per una parte, planteguemos la nuesa quexa nidia porque se convocó la Mesa Sectorial y se mos unvió un borrador d’Instrucciones que lleguen demasiao tarde, pos sabemos que nun va haber negociación porque ta too decidío. Ello ye que primeramente ya teníen esplicao hai díes la desescalada a los centros contertaos

y a los comités de directores de los centros educativos públicos, toe ello ensin contar cola negociación en Mesa sectorial colos sindicatos de la enseñanza pública. Ye más, ye importante destacar que se trata d’una Mesa Sectorial que, énte l’escandalosu silenciu de l’Alministración, vímonos n’obligación d’esixila por rexistru tolos sindicatos el pasáu 24 d’abril, esto ye, fai 25 díes. Además nel pidimientu plantegáremos unos puntos a negociar  que nin siquier fueron incluyíos nun orde del día pa la xunta de güei. Tarazóse’l derechu a la negociación de les nueves o estraordinaries condiciones llaborales del profesoráu nuna situación tan crítica como la que vivimos.  Ello ye que desque s’estableció l’Estáu d’alarma’l pasáu 13 de marzu, l’alministración  convocó a les Organizaciones Sindicales a xuntes informatives”, onde ye verdá que pudimos esponer les nueses posiciones, pero siempres cola alvertencia de que yeren xuntes informatives y non de negociación.

Per otru llau, nel  borrador d’Instrucciones plantégase l’apertura de los centros educativos y l’incorporación del profesoráu pa la docencia presencial cuando Asturies entre na Fase 2 de desescalada, esto ye, el 25 de mayu, nos siguientes casos:  2º de bachilleratu, 4º ESO, el profesoráu d’enseñances profesionales p’atender el desenvolvimientu del módulu de proyectu naquellos casos en que fuera necesario, el profesoráu que sía designáu pa formar parte de los tribunales y comisiones, según el profesoráu especialista de los centros y de los equipos d’orientación educativa y psicopedagóxica.

El borrador d’Instrucciones ta llaráu de inconcreciones, incoherencies y delega nos equipos directivos la responsabilidá de prácticamente toles actuaciones:

–      Voluntariu pal alumnáu qu’asina lo deseye. Nun entendemos que l’alumnáu, menores d’edá en munchos casos, decida cuándo y cómo quier dir al centru y que nin siquier se recueya que tuviera d’haber cita previa. Ensin entrar nin precisar más detalles, esto va xenerar un descontrol mayúsculu. Tampoco sabemos si al que voluntariamente nun vaiga a clases presenciales, hai qu’atendelo telemáticamente.

–      Nun especifica si’l profesoráu va permanecer nel centru namá’l tiempu necesariu p’atender al alumnáu, col horariu del cursu o unu nuevu.

–      Tien d’incorporase’l profesoráu tutor o tutora de 4º d’ESO,  col envís d’organizar l’atención educativa del alumnáu, que s’incorpore voluntariamente, que precise dalgún tipu de refuerzu educativu. NUN entendemos que significa esto ¿Solamente tutor/as? ¿Y quién-yos imparte los refuerzos? ¿Solamente quien precisen refuerzu? ¿Quién lo decide?

–      Cargar con demasiada responsabilidá a los equipos directivos, que tendrán de decidir quién tienen qu’incorporase ya inclusive van poder decidir realizar les evaluaciones finales de forma presencial. Entendemos que nun se puede delegar nos equipos directivos la responsabilidá y toma de decisiones sobre un asuntu tan delicáu. Ello pue ser fonte de conflictu dientro de los claustros y dar llugar a distintes actuaciones según cada equipu directivu y centru. Ye carga-yos con demasiada responsabilidá énte la inhibición de la Conseyería. Amás, tienen d’organizar los espacios, les entraes y salíes, etc.

–      No que cinca a les repercusiones que la docencia presencial pue tener na salú llaboral y nos riesgos pa la salú, manifestemos el nuesu refugu a que los equipos directivos tengan d’aprovir de midíes y medios de proteición a la comunidá educativa, cargando a los presupuestos de los centros, yá de por sí son ruinos, la compra de mázcaros, guantes, EPIs, etc. Tampoco se contempla que los centros tengan  un rexistru de les persones qu’entren nel centru, absolutamente necesario en casu d’andanciu

Tamos énte la crisis sanitaria más grave que vivimos y que de forma directa afectó a la comunidá educativa, una situación qu’obligó a cerrar los centros educativos y al profesoráu a encarar la docencia a distancia nunes condiciones llaborales totalmente tresformaes y truncaes, cambeos que supunxeron un esfuerzu estraordinariu p’atender y dar respuesta a tol alumnáu mientres l’últimu trimestre del cursu colos sos propios medios (ordenadores, conexón a internet,etc.). En tou esti tiempu’l profesoráu caltuvo una actitú meritoria, collaboradora, exemplar y d’entrega y, agora, cuando yá tán organizaos y asumieron tolos cambeos, modificaron les sos programaciones y reorganizaron la so vida, oblígase-yos a volver a los centros, a poner en riesgu’l so salú y la de los suyos, pa ufiertar una enseñanza a la carta al alumnáu qu’asina lo decida y, al que nun quiera dir al centru, el profesoráu va tar obligáo a atendelo a distancia. La xornada llaboral va medrar inda más, los problemes y dificultaes pa exercer la docencia van doblase, pero la Conseyería mira pa otru llau y fai oyíos sordos a les quexes del profesoráu.

Dende SUATEA, una vez más, defendimos que nun se retome la docencia presencial hasta setiembre en tolos niveles educativos. Una vuelta a l’actividá llectiva trai más riesgos que beneficios y ye una midida imprudente, inclusive temeraria, porque nun va poder garantizar la salú de la comunidá educativa, y por estensión, de tola ciudadanía. L’apertura de les aules pa trés o cuatro selmanes nun aporta nada porque’l profesoráu yá s’organizó exerciendo docencia a distancia, yá se raafayó, yá modificó les sos programaciones y la so forma de trabayu y asina tendría de siguir nel tiempu que queda pa rematar el cursu.