Informe de la xunta sobre oposiciones / Propuestes del SUATEA

Énte la reunión celebrada na Conseyería d’Educación cola Xunta de Personal Docente, celebrada esti vienres, 18 de marzu de 2016, en SUATEA queremos facer estes  consideraciones:

Manifestar el nuestru refugu énte’l fechu de que per parte de la Conseyería dirixan el conceyu dos persones del equipu técnicu ensin la presencia de los responsables políticos. El propiu Conseyeru reconoció públicamente qu’hubo disfunciones en convocatories anteriores y afirmó que se diben meyorar  les oposiciones en cuanto a tresparencia y seguridá de los aspirantes. Polo tanto, paeznos qu’esta propuesta presentada, na que se recula de lo prometío enantes públicamente pol Conseyeru, tien qu’esplicase y defendese directamente pol que tien la responsabilidá última na toma de decisiones. Amás, reivindicamos que s’abran meses de negociación reales y que nun se dea trámite a asuntos d’esta fondura en meses informatives nes que les Organizaciones sindicales facemos de “convidaos de piedra” de l’Alministración.

 Per otra parte, instamos a l’Alministración asturiana a que tenga en cuenta que nesti momentu hai convocaos procesos selectivos en Cantabria y Castilla León. Nestes convocatories pueden observase una riestra de meyores y de consideraciones que faciliten enforma’l desarrollu de los procesos selectivos, pa los aspirantes y tamién pa los miembros de los tribunales d’esos territorios. N’Asturies, otra vez, y persabiendo toles disfunciones, mantiénse un modelu que discrimina y pon más dificultaes a los opositores d’esta Comunidá.

Per otra parte, instamos a esta Alministración a que mire poles consecuencies qu’esta convocatoria d’oposiciones, xunto col Alcuerdu de xestión de llistes de profesoráu interín, pueden tener nel colectivu afectáu por esta convocatoria, al que se-y presenta un futuru profesional mui inciertu. Siguimos diciendo que’l profesoráu interín asturianu ta siendo discrimináu respecto al profesoráu d’otros territorios y, por ello, esta Conseyería tien que dar darréu una respuesta a les reivindicaciones d’esti colectivu.

Por too ello, ufrimos esti escritu coles propuestes que dende SUATEA se presentaron en conceyu del vienres pasáu, tanto les que tienen que ver con apartaos concretos del borrador de la Resolución de convocatoria de los procesos selectivos, como otres aportaciones que teníemos entregaes enantes a la Alministración. Pa ello, instamos a l’Alministración a atender les alegaciones presentaes, que, de xuru, van valir pa facer un procedimiento selectivu más tresparente.

ALEGACIONES DE SUATEA A LA PROPUESTA DE RESOLUCIÓN POLA QUE SE CONVOQUEN PROCESOS SELECTIVOS (ver documentu provisional de convocatoria)

 1.1. Les places vacantes presentaes incluyen en delles especialidaes, amás de les aprobaes na ufierta d’emplegu público docente, cerca d’un 40% más p’accesu de los funcionarios de cuerpos docentes a otros cuerpos docentes dientro d’un subgrupu de clasificación superior. En SUATEA, nin entendemos nin compartimos esta cantidá tan grande de places pa promoción interna, porque pue significar el despidu de cientos de profesores interinos del Cuerpu de Secundaria. Como exemplu, nes especialidaes de Lengua, Xeografía ya Historia, Matemátiques, Biología y Geología, Inglés, etc., supondrá que’l profesoráu interín va quedar nuna situación mui delicada. Queremos recordar que en convocatories anteriores d’Asturies y nes d’otres CCAA incluyéronse un 10% de places pa promoción interna, al igual que na convocatoria de Cantabria de 2016.

 3.7. No tocante a les tases, cuidamos que son elevaes de más y qu’había qu’incluyir exención de tases a persones en situación de paru, families numberoses, etc.

Amás, animamos a que se facilite’l pagu de les tases con tarxeta de creitu o débitu.

5.3. No rellacionao coles dispenses pa formar parte de los tribunales, consideramos que tien que s’incluyir la exención por ser tribunal en convocatoria anterior o por tener fíos de menos de tres años. En Cantabria y Castilla León recueyen esta posibilidá. Amás, nun tán clares les causes d’exención qu’afecten a les persones delegaes de la Xunta de Personal.

5.11. Nesti apartáu introduzse la posibilidá d’incorporar asesores especialistes y ayudantes a los tribunales. Consideramos que los tribunales tendríen que xustificar esa necesidá y que la designación tien que se facer por sortéu ente un númberu d’especialistes propuestos.

 6.1. Entendemos que ye necesariu un actu de presentación nel que se dean instrucciones sobre’l procesu y s’espliquen los criterios de correición y valoración. De nun incluyir esti actu,  estos criterios tendríen que se publicar con  anterioridá amañosa o mesmo na Resolución, como se fai en territorios como Murcia, Aragón, etc. Nel apartáu 5.10.1, dizse que se van publicar enantes de la primera prueba estos criterios de valoración, pero nun s’especifica cuándo, polo consideramos que tien que se garantizar tiempu abondo pa que los aspirantes seyan a completar les pruebes según esos criterios ensin vese abocaos a la improvisación. Nes convocatories de Cantabria y Castilla y León incluyen actu de presentación y publicación de los criterios de correición y valoración.

6.2. Ente les causes d’esclusión del procedimientu selectivu inclúyese la non comparecencia al llamamientu únicu, nun siendo que tean motivaes “pola hospitalización por motivos d’embaranzu y/o partu”. Entendemos que  tenía que se contemplar cualquier causa de fuerza mayor que quite de comparecer a los aspirantes.

 7.2.1.1. En rellación cola prueba práctica (Parte A), faise una referencia mui xenérica de los exercicios que pue contener esta prueba pa toles especialidaes, lo que supón que los opositores vayan “a palpu” y que nun sepian cómo tienen preparar y abordar esta prueba. Entendemos que nesta Resolución hai qu’axuntar un anexu qu’incluya les característques de la prueba práctica de cada especialidá, como vieno pasando hasta la fecha nos demás territorios. En Cantabria tán esplicitaos los conteníos d’estes pruebes, incluso con más detalle qu’otres veces.  Nes convocatories anteriores d’otros territorios inclúyese anexu de los criterios de la prueba práctica.

 Panriba,  nun se garantiza l’anonimatu de los aspirantes na primer prueba.  Asturies ye una Comunidá Autónoma pequeña y nun se pue obviar que ye fácil que se conozan ente sí  aspirantes y miembros del tribunal, lo que va escontra’l principiu de igualdá que tien que tara per delantre en cualquier procesu d’esti tipu. Poro, cuidamos que garantizar l’anonimatu de los opositores ye prioritario pa que tolos aspirantes vayan n’igualdá de condiciones. En munchos territorios (Cantabria, Andalucía, La Rioja, País Vasco, País Valenciano, Castilla la Mancha, etc.) nun se fai llectura pública pa caltener l’anonimatu na primer prueba y asina apaez reflexao nes respectives convocatories. El propiu RD 276/2007 establez nel artículu 10.1h) esta posibilidá.

7.2.1.2.1. De la programación docente, establezse que tien que se referir a los  currículos LOMCE, cuando en 2º y 4º d’ESO y 2º de Bachilleratu tovía se funciona por currículu LOE. Polo tanto, entendemos que tenía que dase la posibilidá de que los aspirantes escueyan ente LOE y LOMCE.  En Cantabria, recuéyese esta posibilidá. 

Per otru llau, nun tamos d’alcuerdu cola llargura que se-y otorga a la programación. Paeznos  insuficiente dafechu que sólo pueda tener 30 fueyes. Per otra parte, consideramos mui ríxido que se propongan quince unidaes didáctiques, porque non toles materies nin tolos niveles son iguales. Cuidamos que tendría que s’incluyir una forqueta d’unidaes didáctiques ente 10-15 ó 12-15. En Cantabria y Castilla León, la programación tien que tener 60 fueyes y les unidaes didáctique ente 10 y 15.

 8.1. En cuanto a la valoración de la primer prueba, dizse que “sólo va calculase cuando la puntuación obtenida en caúna de les partes seya igual o superior a 1.25”. Esto implica de facto qu’a estes persones valóraseles con un “ceru” nes llistes d’aspirantes a interinidá, como ya pasó nes convocatories de 2014 y 2015, lo que repercute mui negativamente nel baremu d’estes llistes. Nesti sen, consideramos que ye más correcto que se recoyera tal como ta en Cantabria, onde namás que se fai referencia a qu’estos aspirantes que nun cumplan estes condiciones nun podrán continuar la segunda prueba de los procesos selectivos.

Amás, nun s’establez la posibilidá de reclamar contra les puntuaciones de la primer prueba. Al ser fases eliminatories, un error del tribunal al calificar la primer parte pue dexar inxustamente fuera del procesu a la persona aspirante. En Cantabria contémplase esta posibilidá y redáctenlo d’esta forma: “Contra les puntuaciones obteníes, los aspirantes podrán interponer reclamación delantre’l tribunal nel plazu de dos díes hábiles. Esta reclamación hai que la presentar énte’l propiu tribunal nos mesmos llugares nos que se celebraron les pruebes”.

Anexo I-A (Ap.3.2.1.),  considerar la participación en cursos o actividaes de formación en calidá de director/a, coordinador/a, ponente o docente, tal como ocurre n’otros territorios.

OTRES PROPUESTES

• Realizar un sortéu únicu de temes: que tolos tribunales de la mesma especialidá tengan que desarrollar el mesmu tema y la mesma prueba práctica.
• Na prueba práctica, facer un sortéu ente dellos exercicios propuestos diferentes ufiertar ente ellos diferentes opciones a escoyer polos aspirantes.
• Nun facer repartu de places por tribunal. Si tolos aspirantes desarrollen el mesmu tema y la mesma prueba práctica y, amás, son públicos los criterios de calificación, lo normal ye qu’obtengan plaza les persones que saquen les meyores calificaciones.
• Nel apartáu II “Formación académica”, considerar como méritu les titulaciones de Grau, cosa qu’en delles CCAA yá tienen en cuenta. Por poner un casu, en Castiella y Lleón.
• Tener en cuenta los títulos d’Especialista o Espertu n’asturianu como títulos propios de la Universidá d’Uviéu, de la mesma manera que se tienen otros títulos de postgráu.
• Col finxu d’algamar la mayor tresparencia y al mesmu tiempu respetar la intimidá y privacidá con dalgunos datos sensibles de los opositores, establecer un sistema con claves d’accesu pa que los aspirantes seyan quien a acceder tanto al baremu como a les notes obteníes nes diferentes pruebes. Respetaráse que los opositores accedan solamente a los datos de tolos candidatos de la so especialidá.

Uviéu, 21 de marzu de 2016