Home > Borrador > Final de cursu malu ¿Entamu del siguiente peor?

Final de cursu malu ¿Entamu del siguiente peor?

Final de cursu malu ¿Entamu del siguiente peor?

La bayura datos contradictorios al respective’l denomináu Plan de Desescalada del Gobiernu español y el calter contradictoriu de dellos apartaos tán xenerando una fonda esmolición ente’l profesoráu asturianu. Por si fuera poco, les declaraciones reflexaes nos medios de comunicación de la Sra. Conseyera de cara al próximu cursu escolar, provóquennos mayor esmolición, si cabe. Énte esta situación, dende SUATEA queremos aportunar nos siguientes aspeutos:

1/ Llevamos tiempu diciendo qu’esti cursu va ser prácticamente imposible volver realizar actividaes docentes nes aules. Asina lo tresmitimos nos distintos foros virtuales nos que vamos aconceyando cola Alministración.

Tamos énte situación d’emerxencia sanitaria y, por ello mesmo, tenemos de priorizar la salú de les persones percima de cualesquier otra considerancia. Una torna a los centros supondría abrir la posibilidá a un nuevu brote del andanciu.

Por too esto, dende SUATEA aportunamos en que nun tendríen d’abrise  les aules hasta’l próximu mes de septiembre, centrándomos hasta esi momentu en planiar el próximu cursu que se mos va presentar con importantes faltes que va haber que resolver.

2/ Señalemos la capacidá del profesoráu asturianu p’afaese a unes circunstancies totalmente imprevistes, dando rempuesta a nueves necesidaes y calteniendo el contactu con alumnáu y families al traviés del teletrabayu. Too ello supunxo una brutal desregulación de les condiciones llaborales del profesoráu que vio cómo s’amontaba la so xornada llaboral de forma importante.

A fecha de güei, realizáronse yá planes de trabayu en cada centru pa entamar el fin de cursu nel próximu mes de xunu. Cuando tenemos afitada una nueva normalidá docente y la comunidá educativa se punxo a desenvolvela, vemos con molición el fechu de que l’esfuerzu fechu hasta agora pueda tirase pela borda si s’opta pola reapertura de les aules. Nun vemos factible, de nenguna manera, combinar los planes de trabayu ellaboraos pa desenvolver los llabores docentes  por ordenador cola posible torna de parte del alumnáu a los centros. Refugamos la idea d’arrexuntar al alumnáu en delles aules pero tutelaos por un únicu profesor o profesora. De la mesma que nun podemos entender qu’esa torna del alumnáu tenga un calter voluntariu. Con toles consecuencies, tórnase o nun se torna, reafirmámonos en que nun se torne.

3/ Queremos aportunar nun aspeutu qu’apenes se tuvo en cuenta nesta crisis como ye’l fechu de que’l profesoráu, amás de teletrabayar, tien qu’encarar la so propia conciliación familiar.

4/ Tamos pidiendo-y a la Conseyería que mos informe de cuáles son les sos intenciones énte la nueva etapa que s’avera. Queremos señalar l’actitú opaca cola qu’actúa esta Alministración a la hora de tomar decisiones. Dende l’entamu de cursu, el pasáu mes de setiembre, nun esistieron canales de negociación. La Mesa Sectorial de negociación ye un requerimientu fechu va selmanes y del qu’inda nun tenemos rempuesta.

Col entamu de la crisis los órganos de xestión colectiva nos centros quedaron xelaos na práutica, llámense Claustros o Comisiones de Coordinación. Esta Conseyería nun  tuvo nengún interés en conocer de primera mano la opinión del profesoráu porque nun-y interesó. Sicasí, güei espertemos con una encuesta na que se pregunta al profesoráu por dellos aspeutos básicos del so trabayu rellacionaos cola crisis del COVID 19.

Llámanos l’atención la imposibilidá de caltener l’anonimatu, la tendenciosidad de delles entrugues, el que na so mayoría sían respuestes zarraes y como colofón, la posibilidá de que, en doscientos calteres, el profesoráu pueda facer dalgún tipu de comentariu o aportación énte esta nueva situación que travesamos.

P’acabar, plasmemos coles declaraciones de la Sra. Conseyera nes qu’aboga polo que pue significar la rotura definitiva de les condiciones llaborales del profesoráu con propuestes de trunos rotatorios, la combinación de clases presenciales con teletrabayu, etc. Siguimos esperando la convocatoria de Mesa Sectorial para conocer les intenciones de la Conseyería y anunciamos que, énte una rotura de les condiciones llaborales como les que se suxuren, esta Conseyería va tener enfrente al conxuntu del profesoráu asturianu.

UVIÉU, 4 de mayu de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344