Día Internacional de les muyeres rurales

15 D’OCHOBRE – DÍA INTERNACIONAL DE LES MUYERES RURALES

Esta dómina en que nos tocó vivir, puede dar llugar a una falsa sensación de sabiduría sobro toles coses a quien apodera les tecnoloxíes de la información y la comunicación. Pero dacuando escaézsenos que l’accesu a la inmensa cantidá d’información disponible nun significa, necesariamente, mayor conocencia. Y esto ye precisamente lo qu’asocede cuando, a pesar d’atopanos nesta yera llamada “de la conocencia”, ignoramos lo que cai fora del “mainstream” y, por tanto, vivimos de espaladas  a los problemes qu’otres persones encaren. Por ello son necesaries les efemérides, pa tomar conciencia, recordar, reivindicar.

Esti 15 d’ochobre recordamos, otru añu más, dellos datos que nos siguen poniendo los pies na tierra, esa tierra que les muyeres rurales conocen tan bien. Elles que la trabayen y viven.

Nesti terrén siguimos falando de fienda salarial, de la muyer como única cuidadora del llar y la familia, de la muyer como representante del 40% de la fuerza llaboral agrícola nos países desenvueltos, pero tamién como’l suxetu de la discriminación cuando se fala de propiedá, de participación na toma de decisiones o d’accesu a recursos que lu ayuden a espolletar. Sí, de too esto se fala cada vez más, afortunadamente, porque solo aportamos a ser conscientes d’un problema si lo visibilizamos. Pero ¿qué asocede con otru tipu de situaciones habituales injustamente normalizaes? Poco se fala, por casu, de la frecuencia con que nel mediu rural les muyeres menores de 18 años contraen matrimoniu, lo que supon una barrera pa la educación cimera y l’accesu al empléu, o a empleos meyor remunerados, mayor riesgu de sufrir violencia de xéneru, d’embaranzos tempranos, etc.

Hai que siguir informando, lluchando por y al pie de elles pola reconocencia de los derechos que-yos correspuenden y que en munchos casos nun esfruten y, poques gracies, hai que siguir reivindicando la reconocencia que merecen, bastante ye. A Elles, ¡GRACIES!

Dende SUATEA queremos felicitar a les responsables del podcast “Dalle mio nena”, pol so compromisu coles muyeres rurales asturianes, dando visibilidá al so trabayu en proyectos de emprendimiento y a la so capacidá de diversificar actividaes económiques.

Secretaría de la Muyer del SUATEA

Organización de Mujeres de la Confederación Intersindical