Conceyu informativu cola Conseyería Educación 27/03/20

Celebróse güei, 27 de marzu de 2020, conceyu informativu de la Conseyería Educación coles organizaciones sindicales al traviés de videuconferencia. Los asuntos trataos fueron los que vienen darréu:

• Oposiciones:

La Conseyería defenderá na Conferencia Sectorial d’Educación (Conceyu del Ministeriu Educción coles Conseyeríes d’Educación de tolos territorios) del martes 31 de marzu,  que les oposiciones de Secundaria, FP ya EOI s’aplacen pal cursu 2021 y les de Meestros pal 2022. El principal motivu que xustifica esta posición ye la crisis sanitaria que tamos sufriendo asegurando asina la salú del profesoráu y la población. Defenderá tamién la coordinación ente toles Comunidaes a la hora de determinar la mesma fecha pa la so celebración. Esta fecha ye la definitiva pa resolver la fecha celebración les oposiones. 

Postura de SUATEA: 

Amás de la propuesta de l’Alministración, ufiertemos la posibilidá de caltener les del Cuerpu de Maestros pal 2021 y axuntar les dos convocatories de Secundaria que queden nel 2022. anifestemos la nuestra total oposición a xuntar Maestros/es y Secundaria nel 2021, como ficieron otres organizaciones sindicales, por considerar qu’ello enriestraría dos años consecutivos pa Secundaria.

Demandemos a la Conseyería que tuviere en cuenta la sentencia del Tribunal de Xusticia de la Unión Europea a la hora de proponer midíes énte’l Ministeriu Educación  pa la estabilización del profesoráu interino: prever la fixeza, camudar l’alcuerdu de personal interino o modificar l’accesu a la función docente tresformando les pruebes de la oposición en non eliminatories. 

• Evaluación del alumnáu

Comuniquemos el malestar de profesoráu pola falta claridá nes instrucciones sobre evaluación y les variaes interpretaciones qu’ésti ta faciendo d’elles. 

Pa solucionar esti problema, la Conseyería aconceyará la semana viniente coles direcciones de los centros pa esclariar lo relativo al procesu evaluación nesta anormal situación y dictar a posteriori instrucciones más clares. De mano priorizarán Secundaria porque afecta a segundu de Bachilleratu y EBAU y, más alantre, siguirán con Educación Infantil y Primaria. 

• Fendedura dixital

L’alministración ye consciente d’esti problema y ta trabayando en solucionar les carencies d’equipos informáticos y falta de conexón a Internet que tien munchu alumnáu.

Nós propunximos que s’identificaren les necesidaes d’esti alumnáu y s’emprestaren equipos informáticos 2.0 de los que tán nes escueles. Tamién propunximos habilitar una partida presupuestaria pa financiar los gastos de les conexones a Internet del alumnáu. Plantegamos que, si nun se puen solucionar los problemes que xenera la fendedura dixital, se tenga en cuenta pa la evaluación final porque l’alumnáu  nun pue acabar el cursu en desigualdá de condiciones yá que’l principiu d’equidá tien de guiar la educación. 

• Concursu de tresllaos

Comunicaron que de momentu van cumpliendo  los plazos y que creen que podrán publicar l’axudicación definitiva a mediaos de mayu.  

El próximu martes día 31 vamos tener otru conceyu informativu cola Conseyería onde siguiremos afondando nestos temes y otros como: procesu de matriculación-escolarización, evaluación docente, sustituciones-convocatories personal interino, final de cursu o promoción-cambiu etapa educativa. Siguiremos informando y tresmitiendo les vuestres propuestes.