SUATEA sofita que se pospongan les oposiciones docentes 2020

SUATEA SOFITA QUE SE POSPONGAN LES OPOSICIONES

Na mañana de güei, 25 de marzu, celebróse por videoconferencia  la Conferencia sectorial d’Educación ente’l Ministeriu d’Educación y Formación Profesional y les Comunidaes Autónomes.

Los asuntos trataos teníen que ver coles consecuencies que la crisis del Covid-19 pue suponer pal sector educativu: EBAU, les oposiciones que se deberíen celebrar en xunu d’esti añu, les pruebes d’evaluación diagnóstica, les práctiques de FP nos centros de trabayu, les pruebes d’accesu a la FP de Grau medio y Superior, etc.

Paez que se tomaron decisiones en prácticamente tolos aspeutos trataos, pero nun hubo alcuerdu en relación coles oposiciones 2020.

De tarde, La Conseyería d’Educación publicó una nota informativa n’Educastur na que diz: “El Principáu, partidariu de retrasar a 2021 les oposiciones docentes de los Cuerpos de Secundaria”. Tres la falta d’alcuerdu na xunta, hubo Comunidaes que confirmaron que les atrasen, sicasí, la Conseyería d’Educación d’Asturies alimenta la incertidume ente miles d’aspirantes que quieren saber yá a qué atenese.

Dende SUATEA, esiximos que la Conseyería convoque de forma inmediata a les Organizaciones Sindicales de la Mesa Sectorial pa informanos, consultanos y decidir al respective.  Dende SUATEA, abogamos por atrasar les oposiciones y que, na midida de lo posible, haya coordinación ente les CCAA. Nesti momentu, too indica que la crisis sanitaria va siguir unos meses y nun puede garantizase que puean celebrase nes feches previstes, lo que va añedir a los miles de persones aspirantes más esmolición ya incertidume nesti momentu.

               Uviéu, 25 de marzu de 2020