Home > Centros educativos > Boicot a les reválides

Boicot a les reválides

La Conseyería Educación pretende realizar les reválides de 6u de Primaria y 4u d’ESO magar que yá nun son obligatories.

El portal Educastur publicaba’l llunes 8 la normativa para realizar les reválides de 6u de Primaria y 4u de la ESO nun terciu de los centros educativos asturianos. Estes “Evaluaciones de diagnósticu”, según les noma la Conseyería, durarán dos díes y realizaránse’l 23 y 24 de mayu.

La terminoloxía empleada, evaluación de diagnósticu nun ye ma qu’un intentu de la Conseyería Educación de disfrazar la realidá: la realidaá ye que’l MEC tres les enormes movilizaciones contra la LOMCE y les sos reválides paralizó la so implantación per aciu un Real Decretu que dexaba en manes de les Conseyeríes la posibilidá y les modalidaes de realización d’unes pruebes, que yá nun son censales nin obligatories.

Yá’l cursu pasáu, mientres n’otres comunidaes s’iguaba realizando’l profesoráu un informe sin necesidá de someter al alumnáu al estrés d’una batería d’exámenes inútiles y costosos, el Conseyeru Genaro Alonso elixó n’Asturies por someter a tol alumnáu qu’acababa Primaria a una reválida onde los resultaos se conocieron muchos meses depués y que nun tuvieron nenguna utilidá.

Esti cursu la Conseyería punxo en marcha un nuevu inventu: dividir en tres bloques los centros educativos asturianos y designar asina a quien esti añu- supuestamente el restu los centros examinaránse nos dos siguientes cursos- deberán pasar tamién per un trámite inútil, que nin ye obligatoriu nin tien consecuencia nenguna na titulación del alumnáu: les reválidesde 6u de Primaria y 4u d’ESO.

Al calter antipedagóxicu d’unes pruebes que fomenten la competitividá en vez de la cooperación, qu’estresen al alumnáu y devalúen el llabor del profesoráu, sámase, amás, el fechu de que se realicen nun trimestre mui curtiu sobrecargáu de xeres y nunos díes mui necesarios pa desarrollar l’actividá lectiva normal previa a fin de cursu.  Per otru llau, xunto coles reválides– qu’ocuparán les dos xornaes completes- tanto l’alumnáu como les families deberán rellenar per enésima vez nel cursu inútiles cuestionarios de contestu que, si son como los del cursu pasáu, entren n’asuntos propios de cada familia, al cantu la llegalidá. Amás, faise aumentando la carga trabayu del profesoráu y el desconciertu del alumnáu y les sos families. Y too ello, nun final de cursu como esti, a lo llargo del que les normatives qu’afecten al desarrollu de la vida nos centros fueron cambiando d’un día pa otru; nun ye de recibu, entós, que se vuelva a castigar a la comunidá educativa aplicando, con tantu procuru, una norma retrógrada, obsoleta y refugada por toos en milenta centros.

La Conseyería Educación asturiana quier apaecer como un perllistu alumnu na aplicación d’una llei que sigue amosando la so perversidá. La sociedá asturiana y la so comunidá educativa ven clisaos cómo una vez que’l Ministeriu aceptó esaniciar el calter obligatoriu les reválidas, n’Asturies sigue castigándose a un terciu de los centros a desarrollar unes pruebes d’evaluación final de Primaria y ESO (MEC) que la Conseyería trata de revistir col nome d’Evaluaciones de diagnósticu. ¿Preténdese diagnosticar los problemes al final de la etapa cuando yá nun tienen remediu?

Les organizaciones que participamos nesta rueda prensa facemos un llamáu a les families y al alumnáu pa que nun participen nestes reválides, ensin valor académicu y non obligatories, como yá lo ficieron nel ámbitu estatal el Sindicatu d’Estudiantes y otres organizaciones de la Escuela Pública, que faen un llamáu a la “desobediencia civil” de les families nun llevando a  les sos fíes  y fíos al centru los díes de les pruebes y entamaremos una campaña para esparder esta postura en tolos centros educativos y apañar apoyos. Queremos recordar qu’estes pruebes nun tienen efectos académicos y que nengún estudiante pue ser sancionáu por nun presentase a elles.

Si refugamos la LOMCE, ¿cómo nun vamos refugar les sos reválides?

Esta entrada tamién se puede consultar en: Castellanu