Bienvenida la suba del SMI, anque tarde y probetaya

El profesoráu asturianu sigue esperando pola homologación

L’aprobación de la suba del Salariu Mínimu Interprofesional (SMI) a 1.080 € nun quita de ser una bona noticia, sobremanera si se tien en cuenta qu’ha favorecer a un sector de la clas trabayadora qu’atópase ente los más desvalíos del conxuntu social, con una cualificación profesional baxa y una precarización grande.  Nesi sen, dende’l SUATEA pareznos qu’avánzase anque hai yá años que llevamos planteando la necesidá de qu’esi salariu mínimu suba a 1.200 € como recomienda la Carta Social europea.  

De toles maneres, tenemos que dicir qu’esta medida llega tarde y ye bien probe si tenemos en cuenta les consecuencies que la conxuntura actual de crisis económica ta xenerando ente sectores grandes de la clas obrera y sectores medios de la nuestra sociedá.  

Va poco señalábemos qu’anque’l Gobiernu diz que la evolución de la inflación desaceleró nos últimos meses del añu 2022, la verdá ye qu’eses mesmes fontes nun pueden tapecer el pesimismu a cuenta del mantenimientu de la llamada inflación subyacente, que mete alimentos ellaboraos, d’alta volatilidá y productos enerxéticos. El datu sitúase nuna cifra que supera’l 7% al acabar l’añu. Esti datu alcista nos precios de los productos de primera necesidá come’l yá escasu poder alquisitivu de les families. 

Nel ámbitu docente, el SUATEA denunció munches veces la necesidá d’actualizar lo mesmo la base salarial, competencia del gobiernu central, como los diferentes complementos autonómicos. Llevamos años falando de que se necesita una homologación salarial del profesoráu asturianu que nos saque de los últimos puestos qu’ocupamos en comparanza con otros territorios autónomos.  Esta homologación consiste en crear un complementu autonómicu con una cantidad igual pa tol profesoráu, Esta cantidá, amás d’acercanos a los niveles salariales medios d’otros territorios, diba servir pa intentar compensar la perda de poder alquisitivu que carez el profesoráu estos últimos años. Nun sobra recordar qu’esti últimu añu, el 2022, sufrimos una media d’inflación interanual alrededor del 7%, un datu interesante pa quien presenta la suba salarial del 2,5% pa esti añu como un éxitu. Y otru datu matador: recuperar el poder alquisitivu que llevamos sufriendo dende’l 2010 en 2024 diba precisar una suba salarial del 27%. Cola suba d’esti añu,  la prevista del 2% pal siguiente y el 1,5 % del pasáu 2021 la perda acumulada del poder alquisitivu  pal 2024 va ponese alrededor del 21,5%. Más qu’un trunfu, esa cellebración lo que nos indica son los límites d’hasta onde algunes organizaciones piensen organizar la llucha pola recuperación del poder alquisitivu perdíu.  

En cuenta ponese a igual esta situación, el gobiernu asturiano y los sindicatos collaboracionistes de la UGT y l’ANPE metieron a tol profesoráu na trampa de la llamada Evaluación Docente con unes consecuencies que venimos combatiendo porque significa divisiones salariales ente’l profesoráu que tán males de xustificar. A parte de la discriminación qu’esti sistema supón pal profesoráu non firmante de la Evaluación del desempeñu –quien voluntariamente nun se apunte o quien nun cumpla cola antigüedá desixida —esti sistema aumenta los escalones salariales nos centros, con diferencies que superen los 400 euros por facer el mesmu trabayu, alloñándonos de la idea del cuerpu únicu docente.  

La defensa que los firmantes faen del sistema d’Evaluación docente, presentándose como conseguidores de meyores salariales pal personal docente, nun puede tapecer un fechu qu’a’l SUATEA pareznos relevante. Esti modelu cumple cola perversión de condicionar la retribución a una evaluación que puede llevar a situaciones arbitraries por cuenta de la presencia d’elementos subxectivos ente les persones evaluadores y a les que s’evalua.  

Nun sobra señalar equí les condiciones impuestes pa poder algamar el complementu retributivu: 5 años de antigüedá pal tramu A, y 5 años en tramu A pa poder acceder a cobrar el tramu B. Pa quien venga d’otra comunidá, reconózse-y l’antigüedá y puede incorporase al tramu A si cumple cola antigüedá de 5 años pero nun pueden acceder al tramu B, por munchos años d’antigüedá que pueda tener, hasta que nun trabaye  n’Asturies 5 años. En tolos casos hai que superar les evaluaciones añales, 4 veces, pa poder cambiar de tramu. Hai que recordar tamién que la evaluación consiste nuna valoración del desempeñu que se corresponde cola xera corriente que fae cualquier docente en so centru, seya firmante o non. 

Pero tá hai más.  Esti sistema tapez beneficios pa dambes partes. D’una parte, los sindicatos firmantes que se presenten ente’l profesoráu asturianu como los grandes conseguidores de “meyores salariales”, tapando que s’afiten nun alcuerdu feble que nun consolida lo que tenía que ser un complementu asemeyáu al existente nes nómines d’otros territorios autonómicos. Pero’l gobiernu asturianu tamién se beneficia  porque’l sistema d’Evaluación docente sal más baratu que la homologación planteada pol SUATEA al nun llegar al conxuntu del profesoráu colo qu’aforra una partida presupuestaria significativa como denunciamos na nuestra comparecencia na Xunta Xeneral esti mes de payares pa falar de los presupuestos del añu 2023.  Son 17 millones de euros los que’l gobiernu va aforrar esti añu por nu pagar equitativamente al conxuntu del profesoráu  y faelo col preste de los sindicatos collaboracionistes. 

Con estos tiempos de crisis, onde la inflación arrampla con una parte importante del nuestru poder alquisitivu, ye fundamental insistir na necesidá de lluchar por una suba salarial que recupere lo que perdió toos estos años el profesoráu y denunciar a los que, coles sos propuestes, tresmiten información que distorsiona la realidá. Col sistema d’Evaluación docente divídese al profesoráu asturianu, introdúcense criterios económicos neolliberales inexistentes n’otros territorios y faese un favor al gobiernu asturianu qu’opta pola propuesta más barata y, polo mesmo, la más mala pal personal docente. 

El Secretariáu de SUATEA

Uviéu 08 de febreru de 2023