La Organización de Muyeres de la CI apoya la marcha estatal escontra les violencies machistes

LA ORGANIZACIÓN DE MUYERES DE LA CONFEDERACIÓN INTERSINDICAL APOYA LA MARCHA ESTATAL ESCONTRA LES VIOLENCIES MACHISTES

Sigún la Organización Mundial de la Salú, un 35% de les muyeres del mundu sufrieron violencia de pareya o violencia sexual por terceros en dalgún momento de la so vida. Un 38% de los asesinatos de muyeres comételos la so pareya.

La violencia escontra les muyeres ye la primer causa de muerte prematura d’éstes. Cada añu asesinen a 5.400 muyeres n’Europa. Nel Estáu español, la media de feminicidios ye de 70. Pero hai que recordar que desgraciadamente son más muyeres asesinaes que les qu’entren nes estadístiques y tamién a les que tán ingresaes n’instituciones hospitalaries y les que van quedar con graves discapacidaes frutu de les brutales agresiones que sufrieron. Hai que recordar a les víctimes indirectes y a les neñes y neños güérfanos.

Nun son cifres, son vides, yera la nuestra conseña na Campaña del 25 de payares d’hai dos años. Sabemos que detrás de cada cifra hai una vida rota, pero hai que facer recuento de dalgunos datos. Necesitamos cifres pa denunciar, porque delles veces los númberos ye lo único que paez mover les conciencies.

Cuando falamos de terrorismu machista, d’homes qu’asesinen muyeres, tenemos que sentir falacies como que les muyeres interponen denuncies falses escontra los homes. Pero -sigún la Fiscalía Xeneral del Estáu- namás el 0,018% lo son; el porcentax más baxu d’ente tolos delitos del Códigu Penal.

Sigún el CIS, asesinaron a 755 muyeres nos últimos diez años. Esti añu llevamos 15 feminicidios. Sicasí, casi el 80% de les muyeres que sufren malos tratos nun lo denuncien. Y un 13,2% retiren la denuncia, el porcentax más altu dende’l 2007. La crisis y los recortes que se fexeron polos gobiernos dexaron a les muyeres en situación de maltratu desprotexíes dafechu, ensin recursos, ensin vivienda. A espenses del maltratador, a quien amás -na gran mayoría de los casos- la xusticia entréga-y la custodia de les criaturas, alegando que fueron oxetu de manipulación poles sos madres pa ponelos a la escontra d’ellos.

Esa ye la mesma xusticia, la mesma policía que permite qu’un nenu de diez años se lu asesine cuando l’asesín tenía cuatro denuncies por maltratu. Les mesmes que permiten qu’a Isabel -hospitalizada a causa de la brutal agresión producida pol so home- l’asesine él mesmu nel hospital, cuando había indicios abondos pa detenelu, pa dictar una orde d’alloñamientu, pa protexela a ella. Tantes y tantes inxusticies.

Tamos fartes, indignaes de tantu machista asesín. Hai unos meses, el Ministru de Sanidá facía públicu’l resultáu de la macroencuesta sobre violencia de xéneru con sorprendente optimismu, cuando casi al mesmu tiempu seis muyeres y criatures yeren asesinaes, dos hospitalizaes y una neña agredida sexualmente. El Sr. Alonso facíanos un mapa de la situación alloñáu dafechu d’esta rialidá de constante gotéu de víctimes.

Les estorbises xudiciales, la desprotección, la falta de formación y sensibilidá de tol personal qu’intervien nel procesu, la descoordinación, la falta de recursos asistenciales, el mieu a perder la custodia de les criatures, son sólo delles torgues de les que topen les muyeres en situación de maltratu. Paradóxicamente, el Gobiernu -el mesmu que col so desinterés les dexa abandonaes a la so suerte- diríxe-yos mensaxes optimistes cola so campaña de prevención “Hai salida”.

Dende la Organización de Muyeres de la Confederación Intersindical desiximos del Gobiernu un compromisu real na llucha escontra esta llaceria, la so consideración como una cuestión d’Estáu cola adopción urxente de midíes pa parar esta barbarie amás del restablecimientu y dotación de los medios oportunos pa la prevención de la violencia de xéneru y pa l’asistencia integral de toles muyeres en situación de maltratu.

La nuestra denuncia ye constante. Nos medios, nes cais. Por eso apoyamos la Manifestación Estatal entamada pol Movimientu Feminista pal 7 de Payares en Madrid. Una Marcha Escontra les Violencies Machistes na que la conseña ye común: el refugu a cualisquier forma de violencia escontra la muyer, la desixencia de midíes urxentes polos gobiernos, los partíos políticos y, de secute, la toma de conciencia de la sociedá.

Porque una sociedá que permite que mos asesinen pol fechu de ser muyeres ye una sociedá enferma. Esta Marcha -nacida de la rabia y la indignación énte tantu machista asesín y la impasibilidá de gobiernos y sociedá- va movilizar a tol Estáu, va ser un glayíu unánime de condena y una desixencia al Gobiernu de la consideración d’estes violencies como terrorismu, cuestión d’Estado.

¡El 7 de Payares vémonos en Madrid, Marcha Escontra les Violencias Machistes!
Organización de Muyeres de la Confederación Intersindical

Madrid, 14 de mayu del 2015

#7Noviembre #MarchaContraViolenciasMachista

#TerrorismoMachista #CuestiónEstado

#NosFaltanTodas