Accesu al cuerpu de Catedráticos de música y artes escéniques

Esta mañana tuvo llugar la xunta ente la Conseyería d’Educación, Cultura y Deporte y les OOSS  pa informar de la convocatoria de procedimientu selectivu d’accesu al cuerpu de Catedráticos de música y artes escéniques a que se refier la Llei Orgánica 2/2006, de 3 de mayu.

En dicha xunta la Conseyería d’Educación caltien la so aventadura en realizar una convocatoria que, nel meyor de los casos, namá va sirvir pa gastar dineru en dotar cola cátedra a persones que desempeñen les sos funciones en cualquier Comunidá Autónoma dado que la convocatoria va ser a nivel estatal. La peor de les situaciones va ser que, amás, el profesoráu interín va ver amenorgaes les sos posibilidaes de trabayar n’Asturies, probablemente yá pal  próximu cursu, ya que paez que l’Alministración tien la idea de realizar la publicación de la convocatoria a lo llargo del mes de payares.

Dende SUATEA reclamamos a l’Alministración una postura mínimamente reflexiva sobre esta situación daes les nefastes consecuencies de la convocatoria pal profesáu asturianu, tanto funcionariu como interín, y ello a pesar de les intenciones de la Conseyería d’ufiertar les places que pudieren ocupar los nuevos Catedráticos nuna convocatoria autonómica del concursu de tresllaos. SUATEA esixe la retirada inmediata d’esta convocatoria y la negociación d’una nueva ( baremu, requisitos previos, ámbitu….) que respete los derechos de tol profesoráu asturianu afectáu pola mesma.

SUATEA va informar al profesoráu de los conservatorios de Xixón y Uviéu n’asamblees a celebrar mañana, día cinco, a les 12 y 18 hores respectivamente.