Non tolos centros van poder amenorgar la xornada llectiva en xunu

Tradicionalmente, nos centros de Primaria y Educación Infantil (EI), amenórgase’l ritmu y la intensidá de la xera educativa asina como’l tiempu llectivu nuna hora por razones pedagóxiques: acumulación de la fatiga de los/les escolares nel final de cursu.  

Por Resolvimientu de 30 d’abril de 2021, de la Conseyería d’Educación, modifica per segunda vegada’l Calendariu Escolar pal cursu 2020-2021 no qu’afecta a la organización de la xornada escolar llectiva del mes de xunu col siguiente lliteral: “Con carácter general, en los centros de educación infantil, primaria y educación especial, no podrá establecerse jornada reducida durante los meses de septiembre y junio, no obstante, en aquellos centros en los que de forma habitual no se dispone de servicio de comedor escolar en los citados meses, podrán reducir la jornada siempre cuando la misma resulte compatible con el servicio de transporte escolar“.   

Xustifíquense estos cambeos pola situación escepcional causada pola pandemia y la necesidá de recuperar l’horariu llectivu perdíu’l cursu anterior de resultes del confinamientu domiciliariu y el retrasu nel entamu d’ésti por falta de competencia organizativa de la Conseyería d’Educación. L’efectu d’esta postrera resolución va incidir negativamente nel procesu educativu aumentando la fatiga acumulada por profesoráu y alumnáu, anulando asina’l pretendíu efectu compensador de la midida.  

La resolución va faer qu’unos centros puedan aplicar l’amenorgamientu de xornada y otros non. Nun va poder aplicar l’amenorgamientu nengún centru qu’empreste serviciu de comedor nel mes de xunu. Sí van poder aplicala aquellos centros que nun tengan serviciu de comedor o que teniéndolu a lo llargo del cursu dispunxeren na so programación xeneral añal suspendelu en xunu. Aquellos con suspensión de comedor en xunu, pero tengan tresporte escolar, solo van poder amenorgar la xornada llectiva si la compañía de tresporte lo dexa.

Consecuencia de too ello va ser que va haber alumnáu con serviciu de comedor en xunu y tola xornada escolar llectiva completa, y otro ensin serviciu de comedor y una hora llectiva menos. Va haber profesoráu con una xornada llaboral con una hora llectiva más qu’aquel nel que’l colexu nun empresta serviciu de comedor.  

Dende SUATEA y dende los munchos centros educativos de los que mos lleguen protestes, nun entendemos les razones nin pedagóxiques nin organizatives que lleven al establecimientu d’esta midida xeneradora d’agravios comparativos ente centros, tanto pal alumnáu como pal profesoráu, y esiximos a la Conseyería d’Educación que, poles razones pedagóxiques yá espuestes, dexe, como se venía dexando mientres el mes de xunu, l’amenorgamientu xeneralizáu de la xornada llectiva nuna hora en tolos centros d’Educación Primaria ya Infantil.

El Secretariáu de Suatea

N’Uviéu a 5 de mayu de 2021