Día d’Acción Global pola Despenalización del Albuertu

Güei 28 de setiembre, Día d’Acción Global pola Despenalización del Albuertu, siguimos reivindicando un Albuertu llibre, seguru y gratuitu pa toles muyeres. Siguen produciéndose  una montonera muertes de muyeres, derivaes d’un albuertu inseguru y clandestín. Son munchos los países onde se sigue penalizando l’albuertu, acutando’l derechu al control de la maternidá, o esaniciando dafechu l’accesu a un  serviciu sanitariu seguru, que detenga estes  cruentes y evitables consecuencies. Por ello, vamos siguir reivindicando esti derechu pa toles muyeres.

N’España, el Gobiernu consiguió, gracies a la so mayoría absoluta, modificar la llei de salú sexual y reproductiva y de la interrupción voluntaria del embaranzu llindando l’autonomía de decisión pa les menores de 16 años.

Nestos momentos , nel Estáu español  sigui escolgando sobre les muyeres una espada de Damocles na regulación del albuertu, porque ésta nun ye namá una cuestión política, nin electoralista, ye una cuestión ideolóxica y “de fonderos convencimientos”: la considerancia de la muyer  como ente de plenu derechu o la considerancia de muyer como suxetu pasivu, preséu de reproducción, cuidadora de la so proxenie y sustentadora del sistema granible capitalista y patriarcal, sofitáu pola Ilesia Católica dende los sos oríxenes, como apoloxista  y llexitimadora moral d’esta teoría socio-económica.

El derechu al albuertu forma parte de los derechos reproductivos de les muyeres, siendo’l cimientu de munchos otros derechos que determinen la so llibertá.  D’igual manera que’l derechu al votu foi la base material  pa la nuesa  llibertá, la potestá pa controlar  la nuesa  maternidá apúrrenos l’impulsu pa ser dueñes de les nueses vides.

Una sociedá que penaliza l’albuertu ye la que considera delitu a ésti y delincuentes a les qu’opten por él. Una sociedá que despenaliza l’albuertu ye la que considera que la maternidá merez protexese por  aciu un sistema sanitariu públicu, gratuitu y seguru, que garantice que s’exerza en condiciones deseables y deseyaes, y considera  a les muyeres como responsables y dueñes de les sos vides y los sos cuerpos.

Por eso, dende la Secretaria de la Muyer, abogamos   por una despenalización del albuertu y güei más que nunca.

Esti 28  de setiembre vamos  tar nes cais, defendiendo’l nuesu derechu y el de toles muyeres  a un ¡ALBUERTU LLIBRE, SEGURU Y GRATUITU, LES MUYERES DECIDIMOS!