Falta de diálogu de la Conseyería ante los erros nes llistes y n’Axudicación de Prof. Interín

Un añu más y por non variar nes sos costumes, la Conseyería d’Educación encara un nuevu entamu de cursu polémicu en tolo rellacionao cola axudicación del profesoráu. Magar les repitíes solicitúes de xuntes nes que les organizaciones sindicales pudiéramos treslladar a l’Alministración tolos desaxustes y problemes derivaos de les oposiciones y de la publicación de llistes y axudicación de profesoráu interín, l’Alministración educativa respondió que nun les consideren necesaries. Poro, nun sabemos nada de les  decisiones que tomen nin por qué les tomen, nin la interpretación y respuesta que dan a caúna de les reclamaciones que se producen, nin cuálos son los motivos polos que se trata de forma distinta a unos colectivos o otros, etc. La Conseyería d’Educación nun sabe, nun contesta.
Dempués de los despropósitos y erros derivaos de les oposiciones celebraes n’Asturies, a los que na mayor parte de los casos nun se dieron solución, súmase una primer axudicación de profesoráu interín bien revesosa:
Realizóse l’axudicación partiendo d’unes llistes definitives llaraes d’errores y ensin que l’Alministración abriera plazu pa reclamar ya igualos. Ello ye que danse circunstancies de persones escluyíes nes llistes ensin motivu, lo que los va dexar directamente nel paru; persones que tán  mal baremaes y que se quedaron ensin plaza o en centros alloñaos; o inclusive persones  axudicaes que van ocupar places que correspuenden a otres persones. Dende SUATEA, alvertímos-yos el pasáu xunu, y asina-yos lo treslladamos por escritu, de los problemes que xeneraría nun publicar unes llistes provisionales, col so periodu de reclamación correspondiente, nes que tuvieren toles persones que diben ser aspirantes a interinidá n’Asturies, pero siguieron encerriscaos nunes formes  d’actuación que tán  arruinando l’entamu de cursu una vegada más.  Agora bien, dende SUATEA, entendemos qu’inda ye momentu de enmendar tantu desastre y esiximos que s’igüen en primer llugar los errores per mediu de la publicación d’unes nueves llistes definitives y, de siguío, una nueva axudicación, pues namá asina se van evitar tantos errores en cascada nes axudicaciones.
N’otru orde de coses, denunciamos l’arbitrariedá de l’Alministración  a la d’atender les reclamaciones del profesoráu de diverses especialidaes  que, tres el procedimientu selectivu, viéronse escluyíos de les llistes con distintos criterios nos tribunales (retrasos, títulu del tema, tases…). Mientres unos figuren nes llistes definitives, otros quedaron escluyíos ¿qué solución se -yos da dende esta alministración?
Arbitrariedá tamién a la de resolver los errores provocaos pola Alministración na axudicación de los funcionarios en práctiques. Axudicaron la especialidá de Servicios de Restauración y nun axudicaron les especialidaes d’Orientación Educativa y Bioloxía y Xeoloxía, conculcando los derechos d’esti profesoráu .
Amás, denunciamos la desapaición de 74 places de les ufiertaes na primer convocatoria ensin esplicación dalguna per parte de l’Alministración. Por llamaes que recibimos dende dellos centros educativos, munches d’eses places son necesidaes reales y nun entienden por qué se retiraron.  Si efectivamente fueren necesidaes reales y tuvieren que volver convocales, perxudicaríen a les persones con más puntuación a les que nun se-yos axudicaron pesie solicitales.
Per otra parte, la solución que dieron pal profesoráu ensin convocar de la especialidá d’Informática considerámosla un simple parche, pues afecta de forma collateral a quien tamién tán na llista de Procesos informáticos y pola que tamién taben convocaos.

En cuanto al profesoráu con discapacidá, dempués de la publicación de los destinos d’ayeri, tenemos la constancia de que l’axudicación dexó l’oxetivu del 7% como una utopía.

Dende SUATEA, consideramos absolutamente inadmitible qu’una y otra vez l’Alministración cometa errores y nun atiendan toles denuncies. Ye inalmitible qu’haya persones que se queden ensin trabayu o en puestos que nun-y correspuenden por errores cometíos pola Alministración y que nun s’amuesen dispuestos a igualos. Por ello, vamos siguir lluchando polos derechos y la dignidá del profesoráu interín y vamos esixir un nuevu Alcuerdu d’aspirantes a interinidá que restituya los  derechos perdíos y que dexe ameyorar les condiciones llaborales del colectivu asturianu.

Uviéu, 30 d’agostu de 2016