28 de mayu día internacional d’aición pola salú de les muyeres

Güei día internacional d’aición pola salú de les muyeres, dende la Secretaría de la Muyer de SUATEA, queremos destacar que la salú de les muyeres ye necesaria y fundamental pal desenvolvimientu d’una sociedá xusta ya igualitaria. conmemórase esti día cola fin de afitar que’l derechu a la salú integral ye un derechu humanu universal al que tienen que poder acceder toles muyeres ensin restricciones o esclusiones de nengún tipu y a lo llargo de tola su vida. Entendiendo la salú integral como l’estáu completu de bienestar físicu, mental y social de la persona.

Pero pa millones de muyeres del mundu nun existe esi derechu, n’especial pa les más moces y neñes, les que s’alcuentren en situación de probeza, pa les lesbianes, pa les que son inmigrantes, desplazaes o refuxaes, pa les que viven en zones rurales o urbanes marxinales, pa les muyeres de races o etnies diferentes, pa les que tienen capacidaes diferentes. Muyeres y neñes que, pel mundu alantre siguen sufriendo discriminaciones, violencias, mutilaciones, vexaciones y esclusiones de tou tipu de que nun-yos dexen disfrutar de los derechos humanos consagraos, n’especial del derechu a la salú integral y los derechos sexuales y reproductivu.

Dende la Secretaria de la Muyer de SUATEA, queremos reivindicar la garantía d’estos derechos a toles muyeres. Nel estáu español, onde cola eliminación de la tarxeta sanitaria a munches muyeres inmigrantes ta atentándose contra los sos derechos básicos, como los retayos en sanidá que eliminaron munches pruebes como mamografíes o pruebes xinecolóxiques fundamentales pa la prevención de enfermedaes mui graves. Nel restu del mundu, la mortalidá nel partu y la morbilidá en xeneral de les muyeres ye muncho más alta. En munchos estaos el derechu al albuertu nun esiste ya incluso ta perseguíu. En munchos otros, les mueeres son consideraes seres humanos de segunda.

Por too ello, la Secretaría de la Muyer de SUATEA esixe’l derechu al accesu a una salú sexual sana y reproductiva, accesu a la información y métodos que faen falta pa caltener una vida digna y en plena asunción de llibertá ya igualdá.

Por toles muyeres y neñas, siguimos na llucha porque “los derechos de les muyeres que son derechos humanos”.

                                          Uviéu, 28 de mayu de 2016