Home > Comunicaos > Un Decretu d’accesu ensin garantíes pal profesoráu interino

Un Decretu d’accesu ensin garantíes pal profesoráu interino

EL MECD VA PUBLICAR EL REAL DECRETU D’ACCESU A LA FUNCIÓN PÚBLICA DOCENTE ENSIN UN SISTEMA QUE GARANTICE L’AFITAMIENTU LLABORAL DEL PROFESORÁU INTERÍN

L’Alcuerdu de 29 de marzu de 2017, que preve l’amenorgamientu drásticu de la tasa d’interinidá del 30% al 8%, y la falta de voluntá negociadora del Ministeriu d’Educación pueden provocar un despidu colectivu inadmitible.

Definitivamente,  el MECD fixo oyíos sordos al repitíu pidimientu plantegáu pola Confederación de STEs-Intersindical, nel sentíu de reconocer el fraude de llei cometíu poles alministraciones educatives col usu abusivu de les interinidaes, colo que, una vegada cerrada la negociación, la publicación del nuevu R.D. Transitoriu ye inminente. Con ello, el Ministeriu nun  quixo reconocer el trabayu y l’esperiencia docente de decenes de miles de docentes interinos, de quien s’abusó por conveniencia mientres caltuvieron el sistema educativu n’años de retayos brutales  nes peores condiciones llaborales.

Como sindicatu, STEs-i defende ensin ambigüedaes los derechos llaborales del profesoráu y, por tanto, la so estabilidá llaboral. Yá en 1966, la OIT y la UNESCO establecieron nel so Encamientu 45 sobro la seguridá nel empléu que “La estabilidá profesional y la seguridá del empléu son indispensables tanto pal interés de la enseñanza como pal personal docente y tendríen de tar garantizaes inclusive cuando se produzan cambeos na organización tanto del conxuntu como d’una parte del sistema escolar”.

El problema de la interinidá na docencia pública vien siendo, dende l’establecimientu de la democracia nel estáu español, un mal reinal recurrente al que los socesivos remedios, dende finales de los años setenta hasta l’actualidá, nun apurrieron una solución definitiva por cuenta d’unos marcos llexislativos deficientes y a les doctrines xurídiques que d’ellos que se derivaron. L’alegatu de les garantíes xurídiques pa encetar cualesquier solución al problema de la interinidá ta demostrándose reiteradamente insuficiente, polo que STEs-i caltien qu’hai que dir más allá y acometer los cambeos llexislativos necesarios que dean respuestes xustes, definitives y estables pa que la inestabilidá y la precariedá desapaezan p’algamar l’afitamientu llaboral como funcionariáu del personal interino.

Como propuesta concreta pa la negociación, dende l’añu 2000, el sindicatu plantegó l’establecimientu d’un Accesu Estremáu a la función docente. Esti modelu, aceptáu por otres formaciones sindicales nel so momentu, dibuxa un sistema d’ingresu qu’evite la confrontación ente’l profesoráu interín y el de nuevu accesu, garantizando asina la llibre concurrencia, polo que nun se trataría de pruebes acutaes. El profesoráu interín superó, nel so mayor parte, pruebes selectives onde demostró’l méritu y la capacidá pa la docencia, y de fechu, les alministraciones educatives dexaron cursu tres cursu’l so exerciciu profesional encadenando contratos socesivos.

Los principios constitucionales d’igualdá, méritu, capacidá y publicidá nun tendríen, entós, que suponer una torga pal so afitamientu llaboral. L’Accesu Estremáu, a éstes namá foi hasta’l momentu una propuesta pa una negociación que llamentablemente nunca foi encetada nos términos espuestos, y por tanto, tampoco llegó a ponese en práctica, polo que ye falso que la doctrina xurisprudencial torgue’l so establecimientu. Inclusive teniendo en cuenta la llimitaciones constitucionales, éstes nun esclúin qu’en casos escepcionales, y ésti sigue siéndolo anque persista nel tiempu, puedan arbitrase soluciones como la propuesta.

Col Estatutu Básicu del Emplegáu Públicu (2007), el marcu llegal adoptó nueves considerancies sobro la interinidá na función pública. El EBEP establez que “son funcionarios interinos los que, por razones espresamente xustificaes de necesidá y urxencia, son nomaos como tales pal desempeñu de funciones propies de funcionarios de carrera”, llindando la interinidá fundamentalmente a “La esistencia de places vacantes cuando nun sía posible la so cobertoria por funcionarios de carrera” o “La sustitución transitoria de los titulares”. Amás, dispón que “les places vacantes desempeñaes por funcionarios interinos tendrán d’incluyise na ufierta d’empléu correspondiente al exerciciu en que se produz el so nomamientu y, si nun fuera posible, na siguiente, sacantes se decida la so amortización”.

Pa correxir l’esbocáu recursu a les contrataciones interines, amás, el EBEP incluyó la Disposición transitoria 4ª, pal afitamientu d’empléu temporal pa los puestos ocupaos enantes a 2005. Cola revisión del EBEP en 2015 cometióse l’error de nun actualizar esta disposición transitoria y dexar l’afitamientu de dichos puestos al momentu actual. Sicasí, la mesma norma dispón nel so artículu 61.6: “Los sistemes selectivos de funcionarios de carrera van ser los d’oposición y concurso-oposición que tendrán d’incluyir, sía que non, una o delles pruebes pa determinar la capacidá de los aspirantes y establecer l’orde de prelación. Namá en virtú de llei va poder aplicase, con calter escepcional, el sistema de concursu que va consistir namá na valoración de méritos.”

Les alministraciones públiques incumplieron costantemente les condiciones de los contratos interinos ya incurriendo mientres años nun claru fraude de llei. El problema agravóse nos años de retayos y la llimitación de les OPEs a nun superar el 10% de la tasa de reposición, aumentaron gravemente la interinidá na función pública. Namás con que les alministraciones públiques cumplieren la llegalidá ufiertando toles vacantes estructurales del sistema educativu públicu, la gran mayoría del profesoráu interín seríen agora funcionaries y funcionarios de plenu derechu, y si amás se implementaren midíes llegales escepcionales -lo cual nun ye inconstitucional- el problema taría meyor resueltu inda. La cuestión nun foi la demostración de la capacidá y el méritu de los aspirantes, nin tampoco la condición del principiu d’igualdá nes convocatories, sinón el nun convocar les places riquíes llegalmente y tomar midíes estraordinaries pa solucionar un trestornu que foi aumentando na so escepcionalidá.

Nos tiempos recién, col establecimientu d’una política de retayos qu’inda se caltien, STEs-i denunciemos l’agravamientu de la interinidá hasta la superación de tolos índices históricos y la falta de midíes p’apurrir soluciones.

Les midíes qu’esiximos nun pueden llindase a les garantíes xurídiques d’una llexislación ineficaz argumentaes tanto dende la partes polítiques como la sindicales que, llueñe de reconocer el fraude de llei cometíu poles alministraciones públiques, traxeron de resultes la firma del Alcuerdu pa la Meyora del Empléu Públicu de 2017 y la so plasmación nos Presupuestos Xenerales del Estáu. Tal como denunciamos públicamente, dichu Alcuerdu, robláu por CCOO, UXT y CSI-F y el Ministeriu de Facienda, nin reconoz el fraude de llei nin recupera los puestos de trabayu destruyíos cola escusa de la crisis económica, y enzanca –si non imposibilita- l’adopción de les midíes fayadices pa solucionar la interinidá. El fracasu de la negociación na mesa sectorial del MECD pa l’aplicación d’un Alcuerdu carente de garantíes pal afitamientu real del empléu evidenció que’l gobiernu del PP nin siquier movió pieza pa consiguir un sistema d’accesu transitoriu asemeyáu al de la LOE, que STEs-i tamién defendió in extremis na mesa sectorial.

La solución nun puede consistir n’enfrentar al profesoráu interín coles persones qu’aspiren per primer vegada al trabayu. Les aspiraciones de dambos colectivos son lexítimes y xustes. Les OPEs anunciaes pa los próximos cinco años, cola medría de les xubilaciones producíes nesi tiempu tiempu y la recuperación de los más de 40.000 puestos de trabayu perdíos podríen ser una oportunidá pa dar prestu tanto a llibres aspirantes como pal afitamientu del empléu del profesoráu interino si s’arbitren les midíes necesaries pa ello.

El fraude de llei cometíu poles alministraciones educatives, d’unu y otru signu políticu, son les responsables del constante abusu de les interinidaes, y les víctimes que la tán sufriendo nun  pueden quedar agora nel desamparu y perder el so puestu de trabayu como moneda de cambéu. STEs-i esixe compromisu sindical  y voluntá política, polo qu’aportunamos a les organizaciones sindicales roblantes que denuncien l’Alcuerdu pa la Meyora del Empléu y decisión política a les alministraciones pa encetar una negociación real que nun escluya l’adopción de les iniciatives llegales necesaries pa solucionar de manera xusta la poblemática endémica de la interinidá, tanto na función docente como nel restu de la función pública.

Mientres esto nun se consiga, ye necesariu l’establecimientu de pactos d’estabilidá en toles alministraciones educatives pa que la puesta en marcha de les oposiciones masives que trai l’Alcuerdu pa la Meyora del Empléu Públicu non constituya un ERE incalculable cola sustitución d’una parte del profesoráu por otra.

Secretariáu de STEs-I

Esta entrada tamién se puede consultar en: Castellanu