Termina la mesa técnica plantiyes

TERMINA LA MESA TÉCNICA DE NEGOCIACIÓN DE LES PLANTIYES DOCENTES ENSIN LLOGRAR CONSIGUIR NENGUNA DE LES RECLAMACIONES DE LOS CENTROS

Dende SUATEA planteguemos la necesidá de poner en marcha un plan de choque que dexara recuperar les plantiyes de los centros docentes anteriores a los retayos y d’empecipiar un procesu de meyora de les condiciones de trabayu de los y les docentes. Too ello pasa por un aumentu del profesoráu, pol amenorgamientu de les hores llectives impuestes pola alministración y pol cumplimientu d’unos alcuerdos de plantiyes que tán siendo ignoraos sistemáticamente dende va años.

A pesar d’anunciar un cambéu d’enclín col aumentu de delles places, el procesu negociador foi tremendamente frustrante na midida que nun se cedió per parte de l’alministración a nenguna de los allegamientos plantegaos na mesa técnica celebrada güei. Nun se consiguió más qu’un “va estudise” a cinco casos concretos de los cientos de centros qu’esisten n’Asturies. A esto hai qu’añedir que la negociación llevóse a cabu nun día non llectivu, onde colexos ya institutos tán zarraos y nun hai posibilidá per parte de les organizaciones sindicales de faer nengún tipu de consulta o collaboración.

El próximu miércoles va celebrase la siguiente y última Mesa Sectorial de Negociación. Los plazos fueron mínimos si tenemos en cuenta que’l procesu empezó’l pasáu vienres. Otru añu más les prieses imponen una negociación que nun da tregua. Nesa última mesa SUATEA va denunciar la falta de voluntá política pa encetar globalmente la situación de les plantiyes y la falta de voluntá negociadora p’aceptar les reclamaciones presentaes pelos centros. Ye, a última hora, otra oportunidá perdida pa dar un xiru que llevante’l nuesu sistema educativu dempués de los retayos sufiertos.

Secretariáu de SUATEA

Uviéu, 9 de febreru de 2016