SUATEA refuga que se retome la docencia presencial esti cursu

SUATEA REFUGA QUE SE RETOME LA DOCENCIA PRESENCIAL  ESTI CURSU

SUATEA refuga les midíes que’l gobiernu central anunció para la desescalada del estáu d’alarma nel ámbito educativu. Les midíes qu’está proyeutando’l Gobiernu central, como hasta agora se dieron a conocer per aciu del documentu publicáu pol Ministeriu de Sanidá sobre Previsión pa orientar pal llevantamientu de les llendes  d’ámbitu nacional, sospriéndennos y enllénenmos de preocupación.

De manera concreta, el Gobiernu pretende que na segunda fase de la desescalada s’abran les aules d’Educación Infantil (nenos y nenes menores de 6 años) pe que seyan atendíos nos casos en que los sos proxenitores tengan que trabayar y dicha actividá llaboral nun puea sustituyise por teletrabayu. Con calter voluntariu pal alumnáu, tamién se volvera entamaŕ l’actividá presencial en centros nos niveles de 4º d’ESO, 2ºde bachilleratu, 2º de FP de grau Mediu y Supeerior y últimu añu d’Enseñancesde réxime especial (Conservatorios, EOI, Artes, etc.). Tamién, con calter voluntariu pal alumnáu, abriránse los centros d’Educación Especial.

SUATEA valora bien negativamente estes midíes polos graves interrogantes que planteguen tanto dende un puntu de vista organizativu como sanitariu. Organizativamente, vemos imposible conxugar, coles actuales plantiyes docentes, el siguir atendiendo per aciu del teletrabayu a la mayoría del alumnáu, y, al empar, allegar a los centros educativos p’atender presencialmente al restu nos niveles y etapes qu’afitó’l Gobiernu. Dende’l puntu de vista sanitariu, la preocupación ye enorme pensando na posibilidá de que colexos ya institutos puean convertise en focos d’infección, y docentes, personal de administración y servicios y alumnáu en vectores de transmisión de la enfermedá. Nun entendemos estes midíes, demasiao arriesgaes pa la salú, pa recuperar la docencia presencial unos díes y, sobremanera, cuando la mayor parte del profesoráu ta teletrabayando y yá ta organizao col so alumnáu.

Mención aparte facemos del asuntu de convertir les aules d’Educación Infantil en simples guarderíes pa facilitar la conciliación llaboral de les families nes que dambos proxenitores trabayen fuera casa. Refugamos esta visión d’esta etapa, tan educativa como les del restu del sistema y a la que se-y da, incomprensiblemente, una función social que nun-y correspuende.

Dende SUATEA, entendemos que l’Alministración educativa asturiana, cuidao que estes midíes tienen de ser implementaes poles Alministraciones educatives autonómiques, tien de caltener los centros educativos zarraos hasta’l próximu cursu, y asina lo manifestemos nuna videoconferencia colos comités de Salú Llaboral y Prevención de Riesgos llaborales celebrada güei pela mañana.

P’acabar, como yá manifestemos na xunta de güei, creemos absolutamente necesario centranos en xestionar l’empiezu del cursu próximu porque en septiembre el problema sanitariu de xuru va siguir. Ye importante axustar  les necesidaes de plantiyes de profesoráu, que tienen que reforzase de forma significativa p’amenorgar la ratio alumnáu/profesoráu por aula. Amás, como propunximos, tienen d’establecese una serie de midíes que garanticen les condiciones sanitaries en que tienen d’abrir los centros educativos:

–          Que se-y realicen test PCR a tol profesoráu cuando s’incorpore al centru. Que s’estremen nos centros educativos les midíes hixéniques, se desinfesten a diariutoles sos dependencies, se dean equipos de proteición individual (mázcares, guantes, etc.) tanto a alumnáu como a profesoráu y personal de administración y servicios (siempres al cargu de l’Alministración y non de los centros), y se tomen toles midíes organizativas necesaries (amenorgamientu de ratios, distintos horarios d’incorporación y salida, protocolu de tresporte, de comedores, etc.) p’asegurar el distanciamientu social de toles persones que van convivir en colexos ya institutos.

–          Que se produza una medría de les contrataciones de personal pa que’l trabayu presencial nos centros educativos s’asuma por parte de nuevos docentes, y así facer posible que tol profesoráu qu’agora ta trabayando (n’horarios estendíos dende la mañana hasta la nueche) dende les sos cases, pueda siguir atendiendo a la mayoría del so alumnáu que nun va allegar a colexos, institutos, centros de Régimen especial y d’Educación Especial.

Uviéu, 30 d’abril de 202