SUATEA arrexunta la normativa que protexe la educación pa la igualdá

Esta entrada está disponible en: Castellano (Castellanu)

El sindicatu SUATEA presenta a los medios de comunicación una publicación que recueye una escoyeta de la normativa y documentación que protexe la educación para la igualdá ente homes y muyeres.

Nos últimos tiempos, danse una riestra d’ataques y agresiones a la escuela y al profesoráu que coeduca y que, poro, cumple la llei tal como ta prescrito. La situación creó alarma ente la comunidá educativa y un sentimientu de desprotección énte colectivos reaccionarios que tienen la capacidá económica de llevar a los xulgaos al profesoráu.
La lexislación estatal d’obligáu cumplimientu al traviés de Lleis Orgániques, la lexislación autonómica, les distintes normatives de la Conseyería d’Educación, los currículos oficiales de cada nivel educativu, los resolvimientos internacionales d’organismos como la ONU, UNESCO, principios de Yogyakarta, etc. protexen al profesoráu pa que se lleve a la realidá d’aula la educación pa la igualdá y el respetu a la diversidá sexual. D’esta forma, magar nun se xeneralizó de manera sistemática la coeducación, esta ye obligatoria en cuantos documentos relativos a educación podamos atopar.
El sindicatu SUATEA caracterízase por trabayar por una escuela coeducadora, como asina lo espón yá dende’l so propiu lema: “Escuela pública, laica, asturiana y coeducadora”. Por ello, esti sindicatu nun puede caltenese ayenu a la cultura del mieu que quieren imponer los sectores reaccionarios d’esta sociedá y qu’afecten directamente a la función docente del profesoráu. SUATEA alvierti del peligru que puede suponer el mieu a la desprotección en casu d’agresión por llevar la igualdá y la diversidá a l’aula; SUATEA va tar presente na defensa del profesoráu de la escuela pública que sía atacáu, afrelláu o amenaciáu por cumplir col so llabor docente na construcción d’una sociedá xusta, equitativa ya igualitaria.
Los ataques de los sectores reaccionarios a la escuela pública y a la igualdá y a la diversidá nun son ciencia ficción, son yá una realidá. Estos sectores que se manifiesten en contra d’una convivencia pacífica ya igualitaria de la nuesa sociedá focalizaron los sos ataques, ente otros sectores profesionales, nel profesoráu y na escuela pública: denuncia del programa Skolae de Navarra énte’l Tribunal Cimeru de Xusticia de Navarra, denuncia a un IES d’Huelva por llevar la igualdá a les aules, denuncia a la Directora Xeneral d’Educación de Valladolid por unes charres de Cristina Almeida contra la violencia machista, el pin parental, los folletos de Hazte Oir que llegaron a los centros educativos, etc.
Pretenden que retiremos d’un espaciu d’igualdá que creemos en delles aules con muncho esfuerzu y muncha formación.
Dende SUATEA, consideramos imprescindible dotar al profesoráu de recursos y estratexes pa la so defensa en casu d’agresión. Por ello, publicamos esti compendiu de lexislación, normativa y documentación internacional, estatal y autonómica, pa que la escuela pública faiga valir los sos derechos d’igualdá, el so deber d’educar una sociedá igualitaria que prevenga les violencies machistes, la so esencia d’escuela equitativa y equilibradora de desigualdaes y el so calter d’universal ya integradora de toles realidaes.

COEDUCAR YE … AVANZAR EN DERECHOS HUMANOS,
YE UN DERECHU DEL NUESU ALUMNÁU,
YE UN DEBER DE LA ESCUELA.
¡NON A LES AGRESIONES REACCIONARIES!
FRENTE AL ATAQUE, LA COEDUCACIÓN.

Publicación completa en PDF

Print Friendly, PDF & Email

Esta entrada está disponible en: Castellano (Castellanu)