Home > Comunicaos > Propuesta final de plantiyes: sigue’l sacrificiu la Escuela Pública

Propuesta final de plantiyes: sigue’l sacrificiu la Escuela Pública

Na primer selmana de febreru aconceyó la Mesa Sectorial d’Educación y darréu axuntóse una mesa técnica Alministración-Sindicatos p’analizar les alegaciones presentaes polos centros educativos dempués d’estudiar una primer propuesta oficial que nun cubría les sos necesidaes.

Pa SUATEA, la propuesta de plantiya orgánica presentada pola Conseyería queda bien lloñe de les aspiraciones del nuesu sindicatu. Tanto na Mesa Sectorial como na mesa técnica planteguémos una riestra d’insuficiencies que tienen el so orixe na política de retayos aplicada dende l’añu 2012.  La plantiya orgánica oficial, va tar constituyida a lo último por 9238 places, claramente insuficiente pa les necesidaes detectaes, porque esisten anguaño cerca d’un 30% de places ocupaes por profesoráu interín. Nes meses de negociación estudiáronse  les alegaciones presentaes polos centros y poles fuercies sindicales. L’Alministración namás atendió siete de les presentaes polos centros y una de les más de cien defendíes polos sindicatos. Un datu significativu qu’amuesa’l nulu talante negociador de la Conseyería.

A estes altures conocemos yá de sobra la esistencia d’una serie de “mantres” que se repiten dende l’Alministración pa xustificar decisiones qu’adopten de mano. Asina, el “techu de gastu”, la “racionalización nel usu de recursos”, la “dotación  de personal a partir de les necesidaes detectaes con posterioridá”, una manera d’evitar la creación de puestos reales de trabayu.

Asina y too, SUATEA denunció que colos datos presentaos nun son teníes en cuenta les necesidaes d’atención a la diversidá presentaes polos centros; incúmplense per parte de la Conseyería alcuerdos yá roblaos como’l referíu a la recuperación de les 18 hores llectives en Secundaria pal próximu cursu y les 23 que se reclamen pa Primaria; piérdense places n’Educación Infantil, manteniendo les ratios actuales d’alumnáu por aula;  y tampoco nun se cubren toles tutoríes de Primaria correutamente, tal como s’establez n’alcuerdos en teoría vixentes.

La plantiya presentada queda bien lloñe de lo que tendría de ser un proyectu gubernamental de reversión y recuperación de retayos tres los efectos de la crisis económica na Escuela Pública. Pela cueta, con un ruin crecimientu que nin siquiera cubre les places de les previsibles xubilaciones d’una plantiya avieyada, la propuesta presentada empobínamos al caltenimientu de cotes insufribles de precariedá y consolida un modelu que niega los desdobles a la vez que dexa al voluntarismu del profesoráu la rempuesta a necesidaes que surden y nun se cubren per parte l’Alministración.

SUATEA nun puede, nin de lloñe, responder por una plantiya orgánica que tien más de continuidá que de renovación.

Uviéu 11 – 2 – 2019

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339