Home > Comunicaos > La homologación, la meyor solución

La homologación, la meyor solución

Desque se fixo la tresferencia de les competencies educatives, el profesoráu asturianu ta a la espera de ver cómo se concreten les mesmes nun aspectu esencial, el del so retribución salarial. A diferencia de lo qu’asocede n’otros territorios, onde se creó un complementu autonómicu (integráu nel complementu específicu), nel casu asturianu siguimos a la espera de que la Conseyería mueva ficha nesti asuntu.

Mentanto, pasaron 19 años y el resultáu ye que’l profesoráu asturianu atópase, dientro d’un cuadru comparativu estatal, nos postreros puestos de la cola salarial. En concreto, los terceros pembaxo en Maestros/as y los postreros en Secundaria. Dende l’añu 2007 SUATEA vien reclamando a la Conseyería d’Educación que dea en la creación del citáu complementu pa xenerar una xuba llinial ya igual pa tolos cuerpos acabando asina con esta discriminación histórica que venimos sufriendo.

Mientres estos años los sindicatos ANPE y UXT sofitaron, y agora siguen promoviendo, el sistema d’Incentivu a la Evaluación Docente como mediu prioritariu p’ameyorar  el nuesu salariu. Y ello entá sabiendo que se condiciona la so percepción a la valoración positiva del equipu directivu,  que dexa fora a aquelles persones que tuvieron enfermes l’añu anterior (unes 300 esti últimu añu),  qu’esti incentivu nun se cobra nes pagues estraordinaries,  que nun se revaloriza cuando’l salariu xube (si se tratare de masa salarial, podría dir xubiendo col tiempu) y  que necesita cinco años d’espera pa poder ser cobráu.

Mientres ANPE y UXT prioricen l’Incentivu a la Evaluación Docente como mediu pa la meyora salarial, otros de sindicatos de la Xunta de Personal esiximos igualanos al restu de territorios por mediu del complementu específicu autonómicu qu’estos apliquen. Agora, coincidiendo cola tramitación presupuestaria, estos sindicatos, llueñe de buscar la xuntanza de les fuerces sindicales, descuélguense con un enzarru que busca la propaganda mediática que los dexe apoderase d’una reivindicación, la homologación salarial, pero al traviés del perversu procedimientu de la evaluación  docente que discrimina a parte del profesoráu y estrafica económicamente entá más a los/les docentes.

Dende SUATEA esiximos acabar col maltratu salarial al que nos lleva sometiendo la Conseyería d’Educación. Ello solo ye posible al traviés una homologación que signifique una xuba  salarial llinial, igual pa tol profesoráu (Maestros/es y Secundaria), que forme parte de les retribuciones ordinaries a la que tenemos derechu, ensin necesidá de condicionantes y que nos iguale a lo que se cobra nel restu del Estáu.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344