Escueye la Sanidá Pública

En MUFACE escueye tamién Sanidá Pública: de toos/es, pa toos/es (plazu abiertu en xineru)

Como sindicatu defensor de la enseñanza en particular y del sector públicu polo xeneral, pensamos que la meyor manera de reivindicalu ye siendo coherentes cola nuesa condición de trabayadores públicos/es, defendiéndola tamién como usuarios/es.

L’oxetivu d’esta campaña ye animar al personal que perteneciendo a MUFACE escoyera la opción de recibir l’asistencia sanitaria d’una entidá privada, a pasase al Serviciu Asturianu de Salú (SESPA) al traviés del Sistema Nacional de Salú (INSS)

PLAZU ABIERTU MIENTRES EL MES DE XINERU 

Creemos que sobren los motivos, entá ye más, nun contestu d’emerxencia sanitaria como’l qu’acabamos de vivir, onde vimos a la sanidá pública enfrentar la crisis magar los retayos sufríos, mientres la privada llavábase les manes.

Los convenios con entidaes privaes (Igualatorio, Asisa, Adeslas…) suponen la tresferencia de miles de millones d’euros añalmente a estes empreses, dinero que dexa d’ingresar la sanidá pública. Pela contra, cuantes más persones escoyamos l’asistencia sanitaria na seguridá social, más fondos van tener que dedicase a ella y menos a les empreses privaes, que reciben en función del númberu d’usuarios/es.

Cuando se fala d’atención sanitaria con compañeros/es d’Asturies siempres se suel llegar a la mesma conclusión: si unu/a tien una malura grave, la sanidá pública ye la que te garantiza la meyor atención y los recursos necesarios en cualquier circunstancia. Atiende a tol mundu, en tol territoriu, y les sos decisiones básense puramente en criterios médicos y non en cuestiones de rentabilidá económica, como asocede nes empreses d’asistencia privaes.

El cambéu puede tramitase al traviés de la páxina de MUFACE, pinchando equí.