El Ministeriu d’Educación zarra la puerte a la creación de la especialidá d’asturianu

El Ministeriu d’Educación zarra la puerte a la creación de la especialidá docente de llingua asturiana. Jose Ignacio Wert aconceyó ayeri cola comunidá educativa dientro de la Conferencia Sectorial onde se trató’l nuevu decretu d’especialidaes docentes. La redacción d’esti decretu impide cumplir coles aspiraciones de dignificación profesional del colectivu de docentes de llingua asturiana.

La redacción d’esti nuevu decretu nun s’axusta al textu de la LOMCE, onde’l ministeriu aceptó añadir la Disposición Adicional 38.6 pa permitir que les comunidaes autónomes con llingües ensin calter d’oficial pudiesen mantener la so ufierta educativa. Esti ye’l casu d’Asturies, onde la presencia de la llingua asturiana tien presencia curricular en tolos niveles educativos y ta regulada pola Llei d’Usu y contemplada nel Estatutu d’Autonomía.

La situación anguaño ye complicada, y ye necesaria l’actuación urxente de tolos axentes implicaos, Academia, Conseyería, sindicatos educativos, asociaciones d’estudiantes y de madres y padres…. La última posibilidá de modificar y adaptar esti decretu a la demanda de la sociedá asturiana pasa pol Conseyu Escolar del Estáu convocáu pal 3 de febreru que vien.

Hai que recordar que’l Plenu Conseyu Escolar del Estáu yá se pronunció nel mes de setiembre favorable a la creación d’esta especialidá a instancies de STEs, confederación de la que forma parte SUATEA. Esti muérganu, que representa a tola comunidá educativa del Estáu, afaló al Ministeriu la creación de la Especialidá de Llingua Asturiana. Pero agora’l Ministeriu mira pa otru llau y desatiende la desixencia del mayor muérganu consultivu del Estáu en materia educativo.

Esta demanda histórica de la sociedá asturiana nel so conxuntu vien avalada por inumerables peticiones tanto sindicales, sociales como institucionales. La Xunta Xeneral d’Asturies pronuncióse favorable a la so creación na primavera pasada, asina como la Xunta de Personal Docente d’Asturies que se tien manifestao nel mesmu sentíu en delles ocasiones. Asina mesmo, la propia Conseyera d’Educación Ana González tien manifestao en reiteraes ocasiones que yera un de los compromisos que quería cumplir enantes d’acabar la presente llexislatura col enfotu de dignificar y normalizar la presencia de la llingua asturiana nel sistema educativu.

SUATEA ya pidió una reunión urxente cola Conseyera d’Educación onde abordar esti asuntu, nel que ye perimportante que tol gobiernu asturianu asuma les sos responsabilidaes de lluchar pola nuestra llingua. SUATEA nun va parar hasta algamar que la llingua asturiana sea una Especialidá Docente, de magar les torgues puestes dende’l Gobiernu Estatal y el pocu procuru amosáu pol gobiernu asturianu na defensa del padremuñu cultural y llingüisticu d’Asturies. La oficialidá ye una única midía que garantiza un marcu xurídicu de derechos pa la llingua asturiana.

Disposición Adicional 38 de la LOMCE

6. Aquellas Comunidades Autónomas en las que existan lenguas no oficiales que gocen de protección legal las ofertarán, en su caso, en el bloque de asignaturas de libre configuración autonómica, en los términos que determine su normativa reguladora.