Centros concertaos, una anomalía que nun puede perpetuase

La escuela concertada sigue siendo una anomalía que nun puede perpetuase a cuenta de la rede escolar pública

Les declaraciones efectuaes estos díes pola conseyera d’Educación del Gobiernu del Principáu d’Asturies referíes a la necesidá d’encarar el retu demográficu y la posibilidá de realizar una revisión del mapa escolar, son un asuntu de caláu, máxime cuando, detrás d’esa idea, escuéndese, quiérase o non, el problema que plantega la doble rede d’escuela pública y concertada.

La idea de que, al mediu plazu va haber que dar en una revisión del mapa escolar, significa que llueu se abrir l’alderique sobre un espinosu tema que, plantegáu nos años ochenta del pasáu sieglu, sigue ensin resolvese con enclín a perpetuase. Nesti asuntu, convién recordar que nos sos 45 años d’esistencia, el  sindicatu SUATEA vien pronunciándose pola supresión inmediata de los  conciertos educativos.

Ensin dir más allá, nel añu 2019, nun pronunciamientu públicu señalábemos que SUATEA siempres se manifestó a favor  de  la supresión de los  conciertos educativos (empezando pelos centros de localidaes nes qu’hai ufierta pública asgaya) señalando que la Escuela Pública tendría de funcionar  como  una rede única capaz  de garantizar  una enseñanza universal, igualitaria, inclusiva, llaica y de calidá  pal  conxuntu de    la población escolarizada”  de la que  denunciábamos que “Asturies ta sobrada de crisis y nun precisa añedir nuevos sectores. “Entendemos que na nuesa comunidá, el futuru de la educación pasa pol reforzamientu de la rede pública, garantizando los recursos necesarios pa una ufierta universal y de calidá tanto a nivel humanu como material”.

Mientres tou esti tiempu, llanzáronse miles d’alegatos intentando xustificar la esistencia d’una realidá que nun tien presencia en nengún de los diversos países de la redolada europea occidental. Asina, unu de los más maníos fai referencia a la “llibre elección de les families”, argumentu zorramplu que nun puede esconder daqué que tamién denunciamos yá en numberoses ocasiones. Asina, nel añu 2016 dicíemos que … “esi derechu nun puede tar percima d’una correcta planificación educativa, máxime teniendo en cuenta que solo puede exercese nes árees urbanes, onde s’atopen concentraes la mayoría de los centros concertaos pola Ilesia católica, presentes solo nos llugares onde se llogren ganancies económiques. Sicasí, padres y madres de les zones rurales atopen con que nun pueden exercer esi mesmu derechu a escoyer al ser atendíos esclusivamente pola única rede que garantiza’l derechu a la educación: la Escuela Pública.

El remanecimientu d’esti alderique va sirvir pa que SUATEA vuelva aportunar na so demanda de proceder al esmantelamientu de la rede concertada y aportunar en que la Escuela Pública tendría de funcionar como una rede única capaz

de garantizar una enseñanza universal, igualitaria, inclusiva, LLaica y de calidá pal conxuntu de la población escolarizada.

L’anunciu per parte de la Conseyera de la próxima apertura d’un alderique sobre‘l tema que tendrá de ser equilibráu, llévanos a pensar que, una vegada más, el Partíu Socialista va llevanos al puntu de partida otra vuelta. Dende SUATEA vamos aportunar en tou momentu na necesidá de defender los intereses de la Escuela Pública y volveremos denunciar que mientres la Pública sufre tolos años grandes axustes que se xustifiquen con sides falses y maníes, como la crisis económica, la racionalización del gastu o la baxada de la natalidá, la renovación de los conciertos educativos realízase cada cuatro años dempués d’axustar duramente a la Pública. Nesi alderique, sabemos de qué llau vamos tar.

Uviéu 19 d’ochobre 2022

Secretariáu de SUATEA