Apliquen la LOMCE ensin negociación y recorten más places

LA CONSEYERÍA D’EDUCACIÓN OPTA POR APLICAR LA LOMCE ENSIN NEGOCIACIÓN AL TIEMPU QUE RECORTA CA VEZ MÁS PLACES NEL ENSEÑU PÚBLICU

Na reunión celebrada ente l’Alministración y la Xunta de Personal Docente presentáronse les resoluciones aprobaes por unanimidaá nel Plenu celebráu esti llunes 2 y abordóse la implantación de la LOMCE n’Asturies ente otros temes d’interés.  La Xunta de Personal denunció la conculcación del derechu a la información asina como la falta de negociación de les consecuencies llaborales pa los docentes asturianos.

Nesti puntu, SUATEA acusó a la Conseyería d’Educación d’aplicar la llei de pior forma incluso que’l ministru Wert  n’Asturies. Les desplicaciones de por qué n’Asturies s’opta por una hora de relixón selmanal  pal alumnáu de primaria frente a lo que plantegara Wert pa Ceuta, Melilla y centros del esterior (onde ye de 45 minutos) resultaron patétiques: básense na enorme carga curricular de l’alternativa a la relixón…. Ye un argumento de lo más pelegrino y amuesa la submisión a la ilesia d’un gobiernu que se diz d’esquierdes. Tamién se-y alegó per parte de SUATEA la falta d’apueste pol enseñu de la llingua asturiana y gallego-asturiano, que permanez cola mesma carga horaria qu’anguaño. Reivindicóse la negociación de les condiciones llaborales del profesoráu y amosóse l’esmolecimientu pola situación en que va quedar el de la especialidá de Primaria.  Achacámos-y a la Conseyería d’Educación l’organizar un currículu ensin negociar colos representantes del profesoráu y col envís de sacar resultaos curiosos nes reválides que conlleva la LOMCE.

Nesi sen, SUATEA denunció, al filu de la resolución sobre Amortización de Vacantes y resultes, que’l gobiernu del señor Fernández ta dándo-y una nueva vuelta de tuerca a los centros educativos con más recortes nes vacantes y places resultantes del concursu que se suprimieron y a les qu’agora añádese-y una fase más de recortes que se tán dando y que suponen que decenes de centros n’Asturies van a cuntar con menos profesores pa esti cursu que vien con un númberu igual o superior de grupos y con una mayor carga de trabayu derivada de la implantación chambona d’una llei como la LOMCE.

Otres cuestiones d’interés trataes na reunión fueron el refugu de la Xunta de Personal de la normativa sobre Centros Integraos de FP, el recorte del programa billingüe, y l’actuación de la Conseyería d’Educación na situación educativa en Cangas. Énte estes propuestes l’alministración mantiense nes sos posiciones d’aniciu pesie a la unanimidá del refugu de los sindicatos de la Xunta de Personal

Sobre les oposiciones, l’alministración afirmó que’l día 20 de xunu va entamar el procesu selectivu, del que sedes y tribunales provisionales yá se fexeron públicos. L’Alministración comprometióse a estudiar la posibilidá de tema únicu y anonimatu nes pruebes selectives pa garantizar la tresparencia y torgar cualisquier tipu de favoritismu o discriminación.

Respecto al calandariu d’axudicaciones pal profesoráu interín, SUATEA plantegó otra vuelta la propuesta d’axudicación nun únicu actu  pa tol colectivu.

N’otru orde de coses SUATEA fexo constar na reunión que l’alcuerdu algamáu sobre’l pagu de la parte proporcional de la paga estra de 2012 ye una burlla al profesoráu funcionariu de carrera (recordamos que’l profesoráu interín ingresó eses cantidaes na nómina de mayu) y desixó l’abonu de secute d’esa delda na nómina de xunu.

Uviéu, 5 de xunu de 2014