¿La falta de profesoráu nes aules llámase agora “diferencies de criteriu”?

Les “diferencies de criteriu” ente les necesidaes de profesoráu que piden los centros educativos y lo que los servicios técnicos consideren que tien qu’haber, ye la xustificación pa la falta de profesoráu nes aules que güei da’l Sr. Conseyeru na inauguración de les clases d’Infantil y Primaria. Hai que reconocer qu’hai una meyora, cuidao que nes últimes declaraciones afirmábase que toles escueles disponíen de los docentes que se precisaben y agora declárase que efectivamente hai un desfase que nun dexa indiferentes nin a les direcciones nin a les families.

Esa “diferencia de criteriu” resulta mala d’entender si se llevara a cabu una política que respetare los alcuerdos de Plantiyes, nos que s’establez cuál ye’l númberu de profesoráu que correspuende en función de les aules qu’hai nel centru. Les tutoríes de Primaria o los apoyos n’Infantil tán claramente definíos, sicasí son la mayor fonte de conflictu a la de concedese los pidimientos de les direcciones de los centros. La realidá ye que lo que s’aplica son una serie de criterios numbéricos nos que cada docente se traduz nun númberu d’hores ensin atender otres necesidaes que solo sufren los que tán “a cuerpu de l’aula”. Los especialistes son estrumíos al máximu asumiendo tutoríes y xenerendo medies xornaes hasta la irracionalidá, de forma que nun queda nin un minutu pa les coordinaciones, pa los apoyos, pa los desdobles… Too ello ensin dar tregua a les organizaciones sindicales p’ameyorar les condiciones llaborales del profesoráu, que siguen tando igual que nos peores momentos de la crisis.

Güei que too son bonos deseos p’alumnáu y docentes a la d’encarar el cursu, tamién tenemos que dexar un buecu pa pidir responsabilidá. Y responsabilidaes ye lo que vamos esixir cuando a finales de mes conozamos les places que salen convocaes y veamos que son cientos, cientos de profesores los que güei nun ocupen los asientos vacios nos claustros que tendríen de tar completos dende’l día 1 de setiembre.

El secretariáu de SUATEA

Uviéu 11 de setiembre de 2017