Incumplen los Alcuerdos de Plantiyes soscritos colos sindicatos.

Incumplen los Alcuerdos de Plantiyes soscritos colos sindicatos.

Pesllose güei la Mesa  Sectorial de Plantiyes d’Educación d’Asturies y SUATEA  votó en contra la propuesta definitiva de la Conseyería  por nun responder a toles necesidaes reales del nuestru sistema educativu:

• Nun atienden de manera afayadiza a les necesidaes d’atención a la diversidá que demanden los centros. Nos criterios d’asignación de profesoráu PT y Al síguense criterios numbéricos nun recoyíos en nenguna normativa (10 PT, 20 Al) descuidando amás el llabor preventivu de les sos funciones que se ve condicionáu pola bayura alumnáu qu’atienden y el númberu de centros a los que itineren.
• Nun cubren toles unidaes de Primaria con tutoríes qu’esclusivamente impartan les aries de la especialidá de Primaria.
• Nun respuenden a la demanda que facemos tolos sindicatos de merma de dos hores nel horariu llectivu del profesoráu.
• Nun aumenten la dotación de profesoráu na proporción razonable que sedría necesario p’acabar cola pérdida de puestos de trabayu que se  vien sufriendo dende  los años de la mal llamada “crisis”.
• Nun faen nengún esfuerzu pa caltener les unidaes d’Educación Infantil (piérdense 24) n’espera del repunte demográficu, col agravante de que munches d’elles desaníciense en centros urbanos onde sí se caltienen unidaes concertaes.
• Siguen creciendo los puestos billingües tanto en Secundaria como en Primaria y carecemos de normativa específica pa la so regulación.
• Hai munches places de “necesidaes autorizaes” (30%) que son de plantiyes estructurales. Pasa’l tiempu y nueves propuestes y nun s’integren nes plantiyes. Ello da llugar a que la plantiya de “necesidaes” seya cuasi un terciu de la total, lo qu’usurpa a los sindicatos el so derechu a la negociación y da manga ancha a l’Alministración na movilidá de plantiyes xenerando inestabilidá, precariedá nel emplegu (itinerancies y aumentu de medies xornaes nel profesorá interino) y la consecuente perda de calidá educativa.
• Nun incluyen les plantiyes de Llingua Asturiana y Gallego-Asturianu, nin se fai nenguna previsión o estudiu pa cursos venideros.
• Incúmplen los Alcuerdos de Plantiyes soscritos colos sindicatos.

Per otru llau, cuntábemos con que al rematar la mesa se mos diere dalguna información del númberu de places per cada especialidá na próxima convocatoria d’oposiciones de Secundaria y FP, y nun foi asina. Va haber qu’esperar una o dos selmanes más.

P’acabar, si hubiere que caracterizar estes previsiones de plantiyes tendríemos que falar de continuidá, inmovilismu y siguimientu al pie la lletra de les polítiques restrictives que marca’l Gobiernu. Unes plantiyes onde prevalecen los criterios economicistes y l’axuste estrictu   al horariu establecíu nos currículos pa cada área trai como consecuencia la falta flexibilidá que necesiten pa solucionar los problemes que tien plantegaos el sector educativu. Si nun hai cambeos significativos nel aumentu plantiya y nun se meyoren les condiciones llaborales del profesoráu, nun s’algamará la calidá educativa que toos y toes queremos p’Asturies.

El secretaríau de SUATEA

Uviéu 5 febreru de 2018