Home > Comunicaos > Regulación actividaes non presenciales nos centros educativos

Regulación actividaes non presenciales nos centros educativos

El xueves día 5 axuntóse la Mesa Sectorial d’Educación pa negociar la Propuesta regulación d’actividaes non presenciales del profesoráu nos centros, anunciada unos díes enantes pola Alministración vistu l’agravamientu de la situación sanitaria a cuenta la medría de la pandemia.

Como ye sabío, SUATEA venía solicitando, dende primero qu’empecipiara’l cursu, que les actividaes nes que nun s’atendiere presencialmente al alumnáu, recoyíes nel horariu del profesoráu, nun tuvieren que llevase a cabu, obligatoriamente, de manera presencial, torgando asina apetiguñar persones nos centros educativos. Amás dicíemos que, en munchos casos, los centros nun cumplíen colos requisitos mínimos necesarios pa trabayar con seguridá, nin disponíen de los recursos técnicos necesarios: escasez d’equipos informáticos y/o conexones con anchu de banda insuficiente, fundamentalmente.

Esta mesma selmana, fiximos públicu un comunicáu nel que señalábemos el nuesu sofitu a la midida magar que, al producise una vegada empecipiáu’l cursu y ellaboraos los horarios del profesoráu ensin afaelos a los escenarios pandémicos previstos, la so repercusión sedría distinta ente’l profesoráu de Primaria y Secundaria y podría empiorar les condiciones llaborales dependiendo de cómo se llevara a cabu la so regulación.

Pa la convocatoria de la Mesa Sectorial, la Conseyería fíxonos llegar una propuesta de resolvimientu que, a estes altures, plantegónos una serie de duldes tocantes a les posibles repercusiones que l’adopción d’esta midida puede suponer na desregulación de les condiciones llaborales del profesoráu asturiano.

Na xunta, presentemos una enmienda qu’incorporaba’l compromisu de que nun se modificare la xornada llaboral del profesoráu, tratando de torgar que pudiera invadise la parte correspondiente al horariu de descansu llaboral con toles sesiones qu’agora pasen a ser non presenciales, como asina asocedió’l cursu pasáu a partir de marzu. L’Alministración nun-y fexo casu al nuesu pidimientu.

Per otru llau, ante la propuesta dende la parte sindical de negociar les condiciones de teletrabayu, la Conseyería señaló nun principiu la so disposición a faelo anque, finalmente, nun la aceptaron.

Dende SUATEA asumimos la gravedá de la situación sanitaria, polo qu’entendemos y valoramos la finalidá d’esta disposición, anque aportunamos en que tendría d’adoptase enantes. Sicasí, camentamos que les condiciones llaborales del profesoráu, como les de tantos otros/es profesionales, yá sufrieron alteraciones considerables dende l’entamu de la pandemia que convien dir solucionando ensin poner en cuestión, en nengún casu, la entrega al serviciu públicu que venimos desempeñando.

Anque la Conseyería ufiertó primeramente dalgún cambéu, siguimos considerando que la redacción ye ambigua y probablemente va dar llugar a múltiples interpretaciones y posibles conflictos. Esto foi lo que nos llevó a decantanos pola negativa a aprobar lo que nun ye un Alcuerdu del que pueda faese siguimientu posterior, sinón un Resolvimientu de la mesma Conseyería.


Uviéu 6 de payares de 2020

                        

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348