Xunta cola Conseyería d’Educación 14/04/2020

Güei 14 abril de 2020 pela mañana, celebróse una XUNTA por videoconferencia ente la Conseyería (Dirección Xeneral de Personal Docente) y les Organizaciones Sindicales de la Xunta de Personal Docente.

Ente otros, tratáronse los siguientes asuntos:

1.   Llamamientos pa sustituciones:

La Conseyería informa que ta estudiando cubrir les necesidaes imprescindibles pa l’atención al alumnáu. Tamién comunica que dende la segunda selmana del confinamientu casi nun hubo solicitúes de los centros educativos pa sustitución del profesoráu, ello ye que dase la cifra de 100 reincorporaciones de profesoráu a la so plaza y de una única solicitú de sustitución per parte de los centros educativos.

Dende SUATEA ponemos en dulda la información que nos treslladó l’Alministración porque nos consta qu’hubo baxes por enfermedá y xubilaciones, asina que reclamamos que se retomen de momentu les convocatories y axudicaciones del profesoráu interín sustitutu pa facer posible una  respuesta docente afayadiza al alumnáu. Tol profesoráu ye agora más que nunca necesario pa poder acompañar al alumnáu nesti procesu educativu anómalu y pal que naide nun taba preparáu.

Amás de los derechos del alumnáu, esmolécenmos tamién los derechos llaborales del profesoráu que tendría de facer les sustituciones, pos nun va poder trabayar y va sufrir perda de derechos, como’l cobru del branu, prórroga de contratu, etc.

Per otra parte, na xunta de güei, manifestemos la nuesa protesta pola xunta que l’Alministración celebró ayeri, 13 d’abril, por videoconferencia namás con ANPE y UGT pa tratar el problema de sustituciones, xusto un día primero que se celebrara la xunta con toes les OOSS de la Xunta de Personal Docente. Ye una obligación de l’Alministración responder a les necesidaes y urxencies del sistema educativu, ente elles les sustituciones del profesoráu, y toles Organizaciones Sindicales tamos lexitimaes pa tar informaes y pa esixir rempuestes. Dende SUATEA, consideramos illegal qu’estos sindicatos s’atribuyan derechu a información privilexada y a la negociación n’esclusiva y que l’Alministración-yos síga’l xuegu celebrando esa xunta. Énte actuaciones tan graves, vamos estudiar entamar acciones llegales por favorecer a estos sindicatos frente al restu.

2.   Evaluación docente

Al tar en situación de suspensión de plazos alministrativos, la evaluación docente ta parada, magar tienen yá llistaos de persones almitíes y escluyíes y estos llistaos van ser publicaos en curtiu pa siguir col procedimientu en cuanto se llevante la suspensión de plazos. Garanticen el cobru d’ella a partir de setiembre.

SUATEA aportuna en que’l sistema d’evaluación docente ye un pixín paripé, que lo qu’hai ye que dir escontra’l complementu específicu autonómicu y dexar que tol profesoráu apuerte a ello, que la evaluación docente discrimina a una parte del profesoráu y que eso nun mos resulta almitible.

3.   Otres cuestiones derivaes de la crisis COVID19

Per parte de SUATEA, plantégense les demandes que venimos faciendo dende l’entamu de la crisis sanitaria y que yá espublicemos en forma de comunicaos. El resume de les nueses propuestes ye:

Pa esti final de cursu:

–     Instrucciones clares y precises pa la docencia a lo llargo d’un tercer trimestre ensin clases presenciales, que pongan la vida nel centru, non la burocracia que recarga en devanéu el nuesu trabayu.

–     Midíes efectives y rápides pa que la fienda dixital y social del nuesu alumnáu nun-yos torgue siguir, de dalguna manera, el cursu.

–     Contratación de profesoráu pa cubrir baxes y pa dar rempuesta educativa al cien per cien de los grupos d’alumnáu de cada centru.

Pal cursu 2020-21, que va ser escepcional porque nos tocará trabayar lo que perdiéramos anguaño. Esto solo va ser posible con un esfuerzu per parte de la Conseyería d’Educación que tenga como oxetivos:

–     Baxada de ratios xeneralizada que dexe la recuperación de conteníos.

–     Dotación de plantiyes en tolos centros educativos que contemplen la xeneralización de desdobles nos grupos pa facilitar una atención a la diversidá que, a distancia, ye imposible.

–     Un esfuerzu presupuestariu que revalorice la escuela pública y déxe-y ser la escuela equilibradora de desigualdaes ya integradora que tien de ser.

–     La desapaición de los conciertos educativos pa poder facer tola inversión del dineru público na escuela pública, la escuela de tola población.

4.   Información de la Conseyería sobre otres cuestiones

1.   Tán articulándose los mecanismos pa la repartida de materiales al alumnáu cola collaboración de Conceyos y empreses, pa ello yá se tán dando autorizaciones.

2.   Recuérdase que, dende la Conseyería, nunca nun se dio la instrucción de que fuera obligao pal profesoráu dar el so númberu personal de teléfonu pal tratu con alumnáu y families.

3.   Ta prácticamente zarrada una resolución sobre final de cursu (evaluación, promoción, etc.) que va dar seguridá xurídica al profesoráu, dicha resolución ta a la espera de ser matizada colos conteníos de la xunta col Ministeriu de mañana, miércoles 15 d’abril.

4.   Anuláronse, a solicitú de les persones solicitantes, aquellos permisos solicitaos enantes de la crisis sanitaria que nun s’empezaron a esfrutar.

5.   Pa cuestiones como xubilaciones antemanaes, comisiones de serviciu por cuestiones humanitaries, direcciones vacantes de los centros educativos, etc., tán  estudiándose procedimientos teniendo en cuenta la suspensión de plazos actual.

6.   El plan de trabayu que s’esixe a los centros educativos y al profesoráu consiste “a cencielles” nuna programación básica del tercer trimestre y d’una constatación de los procedimientos pa la coordinación del profesoráu.

Énte esta última cuestión, SUATEA amosó la so protesta pola inesistencia d’unes instrucciones clares, cencielles y precises y pola sobrecarga de trabayu que supón pa los centros educativos, les tutoríes y el profesoráu en xeneral esti plan de trabayu que demanda la Conseyería.

Uviéu a 14 d’abril de 2020