Vuelve la polémica coles desgravaciones de la concertada

Vuelve la polémica coles desgravaciones de la concertada

El pasáu mes de  payares saltó a los medios de comunicación el discutiniu de les deducciones fiscales d’aquelles families que, en dellos años, vinieron desgravando na so Declaración de la Renta unes cantidaes económiques, alegando que se trataba d’un derechu reconocíu que-yos dexaba desgravar por unes supuestes donaciones, que se facíen de manera altruista, a los centros concertaos.

Naquelles feches, la ministra de Facienda, María Jesús Montero, señaló que nesos casos, nun podía utilizase el conceutu de “donación” yá que, en realidá, tapábase una contraprestación, esto ye, que les donaciones sirvíen pa financiar actividaes naquellos centros concertaos.

La posición de Facienda quedó bien clara. Si eses donaciones nun s’axustaben a la llegalidá, les families tendríen qu’efectuar una Declaración complementaria pa devolver a l’Axencia Tributaria el dineru que s’hubiera desgravado de forma non adecuada.

Esta selmana el tema volvió salir nos medios de comunicación al reafitase nes sos posiciones tanto’l Ministeriu como la mesma Axencia Tributaria quien  aportunaron na irregularidá d’eses deducciones fiscales que podríen suponer  en total una cantidá superior a los mil millones d’euros, según les declaraciones de la mesma ministra.

Dende SUATEA creemos que:

Esti asuntu tapa una forma de financiamientu opacu de la escuela concertada. La elevada cantidá qu’habría que devolve-y a Facienda ye lo suficientemente significativa como pa poner n’evidencia la importancia de la rede concertada nel nuesu país que, amás de financiase con dineru público, emplega subterfuxos llegales pa camuflar fontes estres de financiamientu, cosa que les families con fíos menores matriculaos na Escuela pública nun pueden facer.

En realidá, creemos qu’eses donaciones de les families qu’opten pola Escuela concertada, por bien voluntaries que quieran presentase, formen parte del pagu por una prestación recibida. Ye tamién, un elementu segregador que determina los oríxenes sociales de los usuarios d’una 0 otra rede escolar en función de les sos posibilidaes económiques.

Creemos qu’estos fechos ponen n’evidencia mecanismos utilizaos per dellos centros concertaos pa tener una vía extra de financiamientu. Si agora cse confirma la irregularidá de tala práctica, dende SUATEA pensamos que ye necesario adoptar disposiciones llegales que permitan clarificar l’usu d’eses figures a la hora de realizar la Declaración de la Renta.

El Secretariáu de SUATEA

Uviéu, 6 de febreru de 2019