Una universidá privada de La Rioja fadrá l’estudiu sobre l’acosu escolar

Dende la Conseyería d’Educación anuncióse esta selmana la puesta en marcha del Proyectu ciberastur”, una iniciativa empobinada a conocer la situación tocántenes al acosu y ciberacosu nos centros asturianos onde s’imparta ESO, Bachilleratu y TVA (Transición a la Vida Adulta).

Esti estudiu va ser realizáu pola Universidá Internacional de la Rioja, una universidá privada d’enseñanza 100% online que tien la so sede en Logroño. Tenemos de entender que, nuevamente, los recursos de l’Alministración educativa asturiana van parar a entidaes privaes, paez  que nin la Universidá d’Uviéu nin nenguna otra universidá pública puede ufiertar alternatives pa la realización d’un informe sobre una cuestión tan importante y sensible al mesmu tiempu como ye’l bullying y l’acosu escolar. Tampoco queden clares les actuaciones a realizar una vegada conocíos los resultaos. Supónse que se van realizar planes específicos de meyora naquellos centros con mayor riesgu y inclusive se fala de propuestes d’acompañamientu ensin quedar claru si va pagase personal d’esa entidá privada o cómo se van concretar.

A SUATEA llegó’l malestar de dellos equipos directivos que desconocíen por completu la intención de la Conseyería de llevar a cabu esti proyectu. Fueron convocaos cuatro díes enantes p’asistir directamente a la presentación pública realizada na Llaboral Xixón. En munchos d’estos centros ta trabayándose nel programa TEI (Tutoría Ente Iguales), que ye d’implantación voluntaria y yá lleva nello na serie de xeres comprometíes pal so desenvolvimientu efectivu. L’estudiu que pretende realizase agora tien calter obligatoriu y un escasu marxe d’aplicación: del 17 d’abril al 5 de mayu. Al cúmulu de xeres burocrátiques que se desarrollen nel tercer trimestre, que van aumentando cada añu y que dexen a les direcciones y al profesoráu somorguiaos nun númberu cada vez mayor de xestiones, dende la Conseyería saquen nueves “actividaes” ensin consultar nin la disponibilidad de personal nin la oportunidá temporal pa llevales a cabu. Treslladóse a l’alministración el pidimientu de, o bien ampliar el plazu d’aplicación del estudiu, o bien aplazalu pal primer trimestre del cursu próximu. Ye ésta una demanda que la Conseyería tendría d’atender teniendo en cuenta la sobrecarga de trabayu que se vive nos centros nesti tramu final del periodu lectivu.

Dende SUATEA consideramos que les posibilidaes d’actuación del profesoráu ante l’acoso escolar foi amenorgada de resultes de los retayos de los últimos años. L’aumentu del trabayu burocráticu, de les hores lectives y d’alumnáu per aula, la falta de personal pa faer sofitos o desdobles y l’ausencia de profesionales non docentes, como trabayadores sociales, que puedan realizar un trabayu más personalizáu y específicu, repercuten, necesariamente, na capacidá pa encetar los problemes de convivencia y violencia que supon el bullying.

Ta perbién realizar estudios pa conocer la realidá asturiana, pero ¿qué costu va tener esta actuación que se dexa en manos privaes? ¿van traducise les sos conclusiones nuna mayor inversión en profesoráu y otru tipu de profesionales que se demanden nos centros? Les respuestes queden nel aire… como diz el cantar…

Uviéu, 31 de marzu de 2017